Richard Doornbosch: mester implementá un plan di mas aña pa por logra sanea nan finansa públiko.

Punda—  Pa 2021, Kòrsou ta leu fo’i kla ku súplika di sèn for di Hulanda. Ainda gobièrnu di Kòrsou falta 460 mion florin adishonal pa por logra paga su gastunan durante último parti di aña.

Segun minister di finansas Javier Silvania, pa final di 2021 lo tin un défisit di por lo ménos 500 mion florin. Kálkulonan ta indikando mas ku 540 mion florin. Te ainda pa 2021, Kòrsou a risibi 72.5 mion florin pa por a logra paga gastunan di Yüli i algun gastu pa Ougùstùs. Falta ainda por lo ménos 460 mion florin pa logra finansiá e défisit di 550 mion florin. E fiansa pa 2021 ta oumentá aun mas tantu e debe nashonal di Kòrsou.

Segun Banko Sentral na e momentonan aki Kòrsou su debe nashonal ta na 86% di su Produkto Nashonal Brutu. Ta trata di 3.9 miar florin, sin konta e último 169 mion florin pa finansiá e di tres kuartal for di kual Kòrsou a risibi 72.5 mion florin. Segun Banko Sentral, den nan konteo di e debe nashonal no a inkluí e último tranche, esei ta nifiká ku e debe nashonal di Kòrsou ta kasi 4.1 miar florin i 90% di nos Produkto Nashonal Brutu. Ademas, e kuota di debe a subi rápidamente na Kòrsou. Si konta e 460 mion èkstra ku ta bai tin mester pa logra finansiá 2021, pa desèmber Kòrsou su debe nashonal lo ta 4.6 miar florin i surpasá su Produkto Nashonal Brutu.

Segun Richard Doornbosch, Presidente Direktor na Banko Sentral, Kòrsou mester implementá un plan di mas aña pa por logra sanea nan finansa públiko. “Na 2020, entrada di impuesto a sufri un kaida fuerte na Kòrsou i Sint Maarten i gastu di karakter síkliko, manera ònderstant, a oumentá debí na e kontrakshon konsiderabel ku tabatin den aktividat ekonómiko. Alabes, a implementá medida diskreshonario, manera supsidio pa salario i otro transferensia sosial na e gruponan vulnerabel den komunidat durante e krísis di coronavirus”, Doornbosch a splika. “E oumento di gastu na Kòrsou tabata debí tambe na e transferensianan di parti di gobièrnu relashoná ku traspaso di e debenan preferensial di CBCS serka e.o. Girobank N.V.. Un otro problema ku por tacha Kòrsou seriamente den su debe nashonal ta 850 mion florin di Ennia. Si mester kompensá e suma ku un fiansa for di Hulanda, manera a sosodé den e situashon di Giro,  e problemanan lo bira hopi mas serio pa finansas di Kòrsou.