No tin un registro kompletu disponibel pa e grupo aki.

Willemstad——- Indokumentado ta referí na: ‘personanan ku ta biba na Kòrsou sin un pèrmit di residensia i/òf pèrmit di trabou bálido’.

Deskribí e impakto di personanan indokumentá riba sosiedat di Kòrsou ta kuminsá ku determiná e embargadura di esaki. Esaki direktamente tambe ta un reto, pasobra no tin un registro kompletu disponibel pa e grupo aki. Ofisina Sentral di Estadístika (CBS) di Kòrsou ta informá ku e senso ku a kuminsá resientemente por duna mas informashon, pero ku e promé resultadonan di esaki lo ta disponibel te na komienso di otro aña. CBS ta indiká sin embargo, ku tin standartnan internashonal pa loke ta trata e kantidat di hende indokumentá, i ku por buska un konekshon ku esakinan pa por bisa algu tokante e kantidat di hende indokumentá den e etapa aki. Pa motibu di esaki e memorandum aki ta asumí un grandura di e poblashon di persona indokumentá di entre 5% i 9% di e poblashon. SBAB tambe ta konsiderá e margen aki aseptabel a base di e kontrolnan ehersé.

Finansiero: Pèrdidanan di impuesto i primanan sosial

For di e punto di bista di minister di Finansa, pèrdida di entrada di impuesto i primanan sosial ta un di e aspektonan mas konkreto di trahadónan indokumentá. Den kontrolnan ku Stichting Overheidsbelastingccountantsbureau (SBAB) a hasi, hopi bia ta sali na kla ku impuesto i primanan sosial no ta wòrdu pagá pa e indokumentadonan presente. Ademas, empleadonan ta huí hopi biaha ora e tim di kontrol yega. Manera ta konosí, for di momentu ku Gabinete Pisas 2 a asumí su funshon na yüni 2021, a hasi hopi esfuerso pa oumentá kumplimentu ku obligashonnan fiskal. Den esaki ta spera di tur dunadó di trabou ku nan retené i paga impuesto i primanan ku nan debe. Servisio di Impuesto ta fasilitá esaki dor di duna numbernan di CRIB, asta na no-residentenan, independientemente di e statùs di residensia di e persona. Sin embargo, dunadónan di trabou no ta bai inkluí un empleado ku no ta disponé di un pèrmit di trabou bálido den nan atministrashon di salario fásilmente. Esaki pa evitá problema den kaso ku SOAW bin hasi un kontrol. Por argumentá ku personanan indokumentá presente na Kòrsou tòg tin mester di un tipo di entrada. Despues di tur kos, nan tin mester di un dak riba nan kabes i kuminda riba mesa. Solamente impuesto i primanan sosial no ta wòrdu retené i pagá riba e entrada aki. Pa por hasi un kalkulashon di e pèrdida di entrada pa motibu di trabou dor di personanan indokumentá, a tuma komo punto di salida e salario mínimo legal. Despues di tur kos, hopi trahadó indokumentá ta hasi trabou di nivel di estudio abou òf asta sin nivel di estudio, independientemente di nan nivel di edukashon den nan pais di orígen. No mester retené ningun impuesto riba salario mínimo, pero si mester paga primanan sosial.

E primanan sosial ku debe anualmente segun e salario mínimo legal ta ser resumí den e siguiente tabèl:

Pa un empleado ku un salario mínimo, ta debe riba base anual un kantidat di 6.529 florin na primanan sosial. Esaki ta parse di ta un kantidat relativamente chikitu i p’esei mester wòrdu poné den konteksto di e skala general di e problema di indokumentadonan na Kòrsou. CBS a indiká ku na nivel internashonal ta kalkulá entre 5% i 9%. A base di esaki a elaborá 3 senario den e tabèl aki bou:

E tabèl aki ta mustra ku, independientemente di e kantidat eksakto di persona indokumentá na Kòrsou, pèrdida di entrada di primanan sosial den tur kaso ta nifiká un montante supstansial. Den bista di e preshon aktual riba tur e fondonan sosial i e desishon pa tuma medidanan ku ta afektá asta e miembronan mas débil di nos sosiedat, manera stòp di kubri vitaminanan i mineralnan, ta hopi importante pa por kobra e primanan sosial di e grupo di trahadónan indokumentá di un manera.