Outoridatnan a detené diferente persona indokumentá ayera den área di Rif, pero segun veredikto di 6 di òktober 2023, mester evaluá kada detenshon pa determiná si no por duna un kastigu mas leve.

Willemstad,– Ayera den oranan di mainta KPC konhuntu ku persona di Duana a presentá na diferente sitio di konstrukshon den área di Rif. Segun informashon, outoridatnan a detené diferente persona ku no tabata tin un pèrmit legal.

For di e kaso aki, e akusashon lo ta bira ku e personanan indokumentá ta kibra ku lei di estadia (Landsverordening toelating en uitzetting). No ta konosí ainda unda e hòmber lo bai despues di nan detenshon, pero for di un veredikto resien, korte sivil a dikta ku gobièrnu mester evaluá e situashon personal di e hòmbernan detené promé ku manda nan sinta nan detenshon den barak di ilegal.

E veredikto di korte sivil a resumí entre otro ku promé ku detené un ekstranhero, mester skucha e stranhero promé. Promé ku e detenshon mester pidi e stranhero informashon relevante tokante su situashon personal kual por influenshá e desishon pa detenshon den barak. Mester ta na altura entre otro tokante uso di remedi, malesanan ku e indokumentado por tin i si tin demas famia na Kòrsou. Sinembargo, mester evaluá e informashon risibí ku por determiná si e stranhero por risibí medidanan ménos pisá pendiente e deportashon pa e pais di orígen.

Tur e informashon risibí, mester wòrdu butá por eskrito, kaminda por usa un formulario standart pa asina fasilitá e proseso di dokumentashon. Segun e veredikto, e dokumentashon ta importante pa asina aklará ki pregunta i ki kontesta e persona indokumentá a duna i risibí.

Den e desishon di detenshon no mester tin motivashon pa spesifiká kua motibu ta eksistí pa detenshon, sino tambe pakiko no por tin un desishon mas leve pendiente e deportashon. E motivashon aki mester ta relashoná ku e stranhero ku a drenta Kòrsou riba forma ilegal. Ta posibel ku den e motivashon por usa formularionan standarisá kual por yuda ku situashon nan ku sa bini ariba ku regularidat, entre otro na momentu ku hopi indokumentado yega Kòrsou riba lancha pareu.

Akaso e stranhero entregá un petishon di ousilio, e ministerio mester evaluá e petishon di deportashon. E ministerio mester evaluá petishon di ousilio mas lihé posibel i preferibel mesora ku e stranhero entregá su petishon. Mas aleu, e ministerio mester evaluá si e situashon personal di e indokumentado a kambia atraves di tempu.

Por último ministerio di hustisia tin e obligashon pa re-evaluá e situashon di e indokumentado será kada 6 luna di nobo.

Den tipo di kasonan asinaki kaminda a detené un grupo di personanan ilegal, hopi biaha ta hiba e dikushon ku e personanan a kibra ku e lei di estadia kaminda tin un chèns realístiko ku e persona detené ta peliger pa komunidat. Diferente kaso den korte sivil ya kaba a kuminsá kuestioná e akshon ku tur persona indokumentá ta un peliger pa komunidat.