No mas: debi na verediktonan pa labamentu di plaka den pasado, bankonan lokal no ta kore riesgo di finansiá un operashon igual na Campo Alegre.

Seru Fortuna— Komunidat Bankario na Kòrsou, a rechasá tur aserkamentu i posibilidat pa aseptá e transakshon monetario, si akaso bende Campo Alegre i kontinuá komo un sentro di prostitushon. Esaki ta nifiká ku Kòrsou, por lo pronto lo keda sin un sentro, debí na diferente veredikto den korte sivil den pasado.

“Compliance” internashonal pa bankonan korespondiente sigur lo impedí pa bende Campo Alegre i mas aleu depositá riba kuentanan lokal. De fakto, un sentro di prostitushon na Kòrsou lo no por habri ni un kuenta bankario na niun banko. Esaki ta nifiká si kumpra e sentro di prostitushon ku plaka kèsh mes, lo no ta posibel pa depositá e sènnan riba niun banko durante operashon. No por paga di depositá pasobra simplemente no por habri un kuenta di banko.

Resientemente a keda publiká ku esun ku bira doño nobo di Campo Alegre lo risibí tur koperashon di gobièrnu pa bolbe konbertí e lugá den un sentro di prostitushon na airu liber. Asina minister di hustisia aktual Shalten Hato a bisa. Campo Alegre a sera su portanan ora ku e pandemia di Covid-19 a dal aden. Despues di 71 aña e Sentro di Prostitushon aki su operashon a yega na su final. Campo Alegre a ser fundá pa gobièrnu i Iglesia Katóliko pa asina protehá e muhénan di Kòrsou mes kontra e dekadensia moral.

Benta di Campo Alegre mediante un garantia di banko kombiná ku operashon di un sentro di prostitushon ta un kondishon inaseptabel pa bankonan na Kòrsou. Esaki ta lokual tres bankero na Kòrsou a konfirmá na Vigilante, alegando kombinsentemente ku reglanan di kumplimentu internashonal ta prevení esaki.  Campo Alegre tabatin miónes na debe i medidanan di Corona a pone ku esaki tambe a kousa debenan astronómiko. Minister Públiko kier bende e lugá na vindishi pero esaki a keda posponé. E sèn ku e vindishi generá lo mester  bai den e fondo di krímen. E motibu pakiko gobièrnu kier koperá pa e lugá habri bèk, ta e mesun motibunan i 71 aña pasá. Prohibí prostitushon den kayanan di Kòrsou i den nos sentro di suidat i tambe kombatí enfermedatnan venériko. Departamentu di hustisia, sinembargo ta duna atenshon spesial na trato di ser nan humano i muhé nan atraves di Campo Alegre.

E informashon di antesedente di krímen i labamentu di plaka na Campo Alegre, anke ta trata di operashonnan den pasado, no ta pasa reglanan di kumplimentu na niun banko lokal. Ku por keda prostituí den Campo no ta konosí. Tur gobièrnu promé ku gabinete Pisas II a indiká di lo mantené e maneho di toleransha ku tin vigente pa por hasi negoshi di prostitushon den e resort. Gobièrnu a laga hasi un investigashon pa wak kon sigui.