Ekspertonan ta rekomendá pa introdusí un Fondo di Solidaridat pa Ennia.

Punda—Un komishon instalá pa minister di Finansas Javier Silvania, a pone dos opshon riba mesa pa solushoná problema di Ennia Caribe Holding, mas spesífiko Ennia Leven. Ta regardá e kompania su bolsa pa seguro di bida, Ennia Leven. E komishon a yega na dos solushon alternativo, unda unu lo kosta 1.2 miar florin, miéntras e otro lo kosta 600pa 700 mion florin.

Al final, ta siudadanonan na Kòrsou mester paga na impuesto i ta trata di un tèrmino di entre 25 pa 30 aña. Manera menshoná den artíkulonan anterior, den e komishon instalá tin ekspertonan internashonal  i lokal sostené pa Delloitte & Touche huntu ku aktuario internashonal Phenox. Nan a yega na dos senario. Sea ta “run off” Ennia Caribe Leven of ta hasi un Kontinuashon Nobo, pa lora skapa e empresa di seguro mas grandi riba teritorio ulandes den Karibe. E desishon ta den man di Kabinete Pisas. Manera ta konosí, pa yüni próksimo Korte di Apelashon mester tuma un di dos desishon den kaso Ennia, riba un claim di kasi 1.1 bon florin ku Ennia i Banko Sentral a imponé riba grupo Ansary. Apesar di intentonan di korte pa partidonan yega na otro pafó di korte, no a logra yega na un entendimentu. Pendiente e desishon di korte, e Komishon Resolushon Ennia a yega na dos konseho, kual sea fo’i saku robes òf esun règts, e yu di Kòrsou mester bai paga.

E siman aki minister di finansas Javier Silvania a manda un karta na presidente direktor di CBCS, Richard Doornbosch. Segun e minister, a laga instalá un komishon di resolushon. E komishon a traha un rapòrt i awe mester presentá esaki na Hunta di Minister pa un desishon. Chèns ta grandi ku e desishon riba e rapòrt ta keda posponé debí na ousensia di ministernan den eksterior. E dos senarionan presentá den e resolushon ta proponé pa fia sèn riba merkado di kapital finansiá e debakel riba solbabilidat di Ennia a konsekuensha di desishonnan den pasado pa permití grupo Ansary kometé un sakeo di 1.1 miar florin for Ennia Caribe Holding.

E komishon ta papiando di dos senario. Den e senario di “run off”, ta kalkulá ku tenedónan di pólisa ta bai pèrdè mas ku 80% di nan derechinan riba penshun. E deskuento ta basá riba e situashon finansiero aktual na Ennia. Den e senario di Run Off, mester tene kuenta alabes ku e deskuento ku mester bini si akaso opta pa bende e aktivo (balorá na bolsa di penshun) i na kua preis esaki ta keda negoshá. Lokual e komishon ta splikando ta ku mas deskuento duna riba e balor di e bolsa mas atraktivo e ta bira pa kumpradónan, pero e tenedó e polisial su balor ta baha konsiderablemente. Den e senario di Run Off, gobièrnu di Kòrsou su kontribushon ta bira por lo ménos 1.2 miar florin repartí riba 25 aña. Ekspertonan ta kalkulá un peso di likides di por lo ménos 50 mion anual. No ta spesifiká si esaki ta inkluso interes.

E senario di Kontinuashon ta mas kompliká pero ku ménos konsekuensha, anke komunidat tei paga den e senario tambe. Pa kontinuá ku Ennia, e taha desaroyonan negativo, ekspertonan ta kalkulá un nesesidat di 700 mion florin na invershon. (atrobe no a konsiderá e claim di 1.1 miar riba grupo Ansary). E senario di Kontinuashon, manera menshoná ta mihó pero alabes mas kompliká pa ehekutá. Ta trata di un kombinashon na faktor pa yega na faktibilidat riba kontinuashon i bou di kua kondishonnan por invertí kapital nobo den Ennia.

Ekspertonan ta rekomendá pa introdusí un Fondo di Solidaridat pa Ennia (Leven). E Fondo di Solidaridat ta fungi komo un fondo di garantia den kasonan emergensia pa Ennia tin un fondo standby. E Fondo ta protehá komunidat di Kòrsou di no karga e kostonan i konsekuenshanan. Pa por yega na e fondo, mester bai fia riba merkado di kapital, mas ingreso den sektor finansiero (konsumidó tei paga), uza parti di reservanan nashonal depositá na Banko Sentral i depositá dividendo di Banko Sentral den e fondo.

Awe en todo kaso, Hunta di Minister ta kuminsá reuní riba e dos alternativanan.