Anthony van den Hurk ta riba lista, pa ta bèk ku nos ekipo.

WILLEMSTAD—Nos selekshon nashonal di futbòl, na inisio di aña a bira ofisial di ta konta ku tékniko Dick Advocaat, komo nos ‘headcoach’. Esaki unda ku tambe tabatin basta rumor, di lo bai konta ku tur e futbolistanan oriundo di nos isla, bon konosí i ku nòmber mundialmente, kende lo djòin riba e ruta pa mundial di futbòl 2026.

Khalid Sinouh
Mientras tantu, despues di e parti ofisial di nombramentu di nos tékniko nobo, tambe a será Kòrsou konosí ku entre otro e Direktor Tékniko di nos selekshon, den persona di Khalid Sinouh i tambe a hasi anunsio di algun persona mas, ku tambe lo ta parti di nos kuerpo tékniko.

Giovanni Franken
Seguidamente, Khalid den un entrevista na radio na Hulanda a anunsiá ku Giovanni Franken, lo ta parti di e kuerpo tékniko, komo un di su asistentenan.
Seguidamente, Khalid den un entrevista na radio na Hulanda a anunsiá ku Giovanni Franken, lo ta parti di e kuerpo tékniko, komo un di su asistentenan.

Refuersonan
Mas aleu tabata na inisio di e luna aki, ku e tékniko mes, Dick Advocaat, tambe den un programa na Hulanda, a indiká ku tabata difísil pa por keda kla ku e refuersonan ku un i tur a pensa i soña kuné, despues di su yegada.

Raymond Mulder
Algun dia despues a bira konosí, ku e tin un trainer nobo pa kiper den su kuerpo, den persona di Raymond Mulder.

Lista di hungadónan konvoká
Finalmente tabata djabièrnè último, dia 8 mart 2024, den oranan di anochi, ku FFK a emití un komunikado, den kual e ta anunsiá e lista di e 23 hungadónan konvoká, pa ta den akshon pa selekshon Kòrsou e luna aki.

Trainingscamp
Un ke otro lo tuma lugá na Turkia, unda ku durante di e siman di dia 18 te ku 25 mart próksimo, nos ekipo nashonal, lo ta presente pa un trainingscamp.

2 wega amistoso
Komo parti di esaki nos lo hunga 2 wega amistoso, enfrentando e ekipo di Hull City di Championship na Inglatera i e ekipo di Super Lig di futbòl na Turkia, Alanyaspor, ku ta konta ku entre otro e mundialista oriundo di nos isla, Leroy Fer.

Kontrinkantenan
Hull City ta na di 7 puesto riba e tabla di posishon di Championship, ku ta konta ku 24 ekipo. Nan tin 58 punto, despues di a hunga 37 wega. Mientras ku Alanyaspor, ta na di 12 puesto na Turkia, den kompetensia ku ta konta ku partisipashon di 20 ekipo. Nan a hunga 29 wega i tin 36 punto.

Nos futbolistanan
Pa loke ta e lista di 23 hungadónan konvoká, Deporte Vigilante awe, lo kompartí kiko algun a hasi ku nan ekipo, den nan último kompromiso realisá. Un ke otro unda ku mañan, lo kompartí demas i seguidamente tambe mas informashon di kada unu.

Eloy Room
Ta hunga 90 minüt den gol pa Vitesse den wega ku nan a pèrdè 3-1 kontra RKC Waalwijk den Eredivisie na Hulanda.

Kiper Trevor Doornbusch di FC Dordrecht tabata komo suplente i no a logra mira akshon djaluna último, ora ku su ekipo a parti punto ku ADO Den Haag den Eerste Divisie na Hulanda.

Roshon van Eijma tabata ousente pa Top Oss djaluna último, despues ku djabièrnè tras di lomba el a hunga 90 minüt kompletu i risibí karchi hel, den wega di Eerste Divisie na tera friu.

 Juriën Gaari a drenta pa hunga durante di e último 7 minütnan di wega pa RKC Waalwijk, ora nan a topa Vitesse den Eredivisie djasabra último.

Ar’jani Martha a hunga 90 minüt pa Jong Ajax djaluna tras di lomba, ora ku nan a gana di De Graafschap 2-0 den Eerste Divisie di futbòl na Hulanda.

Justin Ogenia a inisiá i hunga te na di 64 minüt djaluna último den Eerste Divisie pa FC Eindhoven. Tabata ora ku nan a gana Jong FC Utrecht 3-0.

Leandro Bacuna tambe a hunga 90 minüt djaluna último. Un ke otro  pa FC Groningen, ora ku nan a gana Jong PSV 3-2, den Eerste Divisie na Hulanda.

Kevin Felida a inisiá wega di RKC komo suplente i a hunga durante di e 45 minütnan di e di 2 mitar, ora nan a gana Vitesse djasabra den Eredivisie.

Godfried Roemeratoe a inisiá, risibí un karchi hel i hunga durante di e promé 45 minütnan di wega pa RKC, ora nan a gana Vitsse djasabra tras di lomba den Eredivisie.

Jaron Vicario a inisiá i hunga 80 minüt pa FC Den Bosch, den wega di Eerste Divisie na Hulanda djabièrnè último. Tabata na momentu ku a gana Top Oss 2-1, den wega ku e tabatin un asistensia.

Rangelo Janga a inisiá wega na banki komo suplente djaluna último na Chipre, pero a drenta pa hunga durante di e último 24 minütnan di wega bálido pa 1st Division, ora su ekipo Nea Salamis a parti punto, empatando 1-1 ku AEL Limasssol.

Xander Severina tabata den akshon ku Partizan Beograd den Super Liga di Serbia, djasabra ku a pasa, ora su ekipo a logra un punto, i e mes a inisiá i hunga 75 minüt. El a keda ekspulsá despues di risibí su di 2 karchi hel di wega.

Anthony van den Hurk a inisiá wega na banki komo suplente djaluna último i a drenta na minüt 68, pa hunga te final pa Helmond Sport, ora ku nan a gana Jong AZ 3-1, den Eerste Divisie na Hulanda.