Vehíkulo ku e víktima tabata manehá i a bin aksidentá i pèrdè su bida.

Willemstad— Djarason mardugá Kòrsou a registrá otro morto den tráfiko ora ku un hòmber manehando su vehíkulo a bin aksidentá riba Schout bij Nacht  Doormanweg i a bin fayesé.

Djárason 27 di mart 2024 alrededor di 01.47’or, Sentral di Polis a risibí notifikaskon ku tin un aksidente di tráfiko ku a tuma lugá riba Schout bij Nacht Doormanweg  na altura di un klínika i ku tin un persona pegá den outo i ta  gravemente heridá.

Mesora a dirigí un unidat polisial na e sitio. Na yegada di e unidat, el a topa ku un shofùr ku no tabata duna señal di bida. For di investigashon preliminar ku polis a hasi na e sitio, a resultá ku e víktima a dal den un palu i a keda pegá den su outo.

Alrededor di 02.35’or, dòkter di polis a konstatá morto di  hòmber, ku a bin a fayesé na e sitio a konsekuensia di heridanan ku el a sufri durante di e aksidente.

Ta trata di e hòmber Cedric Patricio Bernabela, nasé na Kòrsou dia 27 di ougùstùs 1956.

Personal di Departamento di Tráfiko ta investigando e kaso. Di parti Vigilante ta ekstendé palabra di kondolensia na famia di e defuntu ku pèrdida di nan ser kerí.