Gilbert Martina, direktor CMC

Otrobanda–  Un kantidat di 4 spesialista a tuma nan retiro for di CMC, a konsekuensha di e Lei pa Plafon Salarial. Gilbert Martina ayera a konfirmá e notisia na Vigilante pero no tabata kier a bai den detaye.

“Tin 4 spesialista ku a entrega nan retiro pa motibu di LNT. Nos ta hasiendo adaptashon na e pakete di kondishonnan laboral pa por ofresé kandidatonan nobo” tabata lokual Martina a duna di konosé na Vigilante. E direktor no tabata kier a bai den detaye pa splika kua ta e spesialistanan kende a tuma nan retiro. For di dos luna pasá CMC a analisá kuantu spesialistanan ta ganando ménos ku Promé Minister i kai for di e areglo LNT. Manera ta konosí e plafon salarial pa spesialistanan na CMC a bira 385 mil florin brutu pa aña. CMC na e momentonan aki ta analisando ta kuantu di e spesialistanan den nan servisio ta kai bou di e plafon. Direktor Gilbert Martina, no tabata kier a konfirmá e notisia alegando ku “nos no por bai den e detaye di salarionan na CMC, pero ta hasiendo ehersisionan

Entretantu no tin sufisiente spesialista ainda na CMC, miéntras algun ya ta planeando pa baha of bai for di CMC. Lista di espera di operashon na CMC, por surpasá 3000 pashènt na finalnan di 2023 si no bini un solushon riba e problema di spesialistanan. E asosashon di spesialista LVMPiLC  ta teme lo peor.  Aparte di no tei risibi mas spesialista, tin riesgo ku esnan presente tambe lo sea bandoná Kòrsou òf CMC pa buska un mihó entrada. Hopi spesialista na CMC ta sinti nan mes engañá, despues di a djòin CMC pa awor gobièrnu mes pone un plafon salarial riba nan. Segun e spesialistanan , no ta bai pa e sèn, sino mas bien pa e kontinuidat di kuido. E problema ta si mantené e plafon salarial, Kòrsou ta sigui tin problema pa atkerí spesialista.