Fransisco Mancelli di Lead Group.

Nieuwe Haven—Awe ta D-Day pa 496 mil bari di fuel oil den tankinan na Bullenbaai. Un bèrgwensa internashonal ku Kòrsou mester deshasí mas lihé posibel di dje. Un fuel oil ku Refineria di Kòrsou a permití drenta di kontrabanda, ku a kousa mal imáhen pa Kòrsou i relashoná Refineria di Kòrsou ku e kompania estafador, United Petroleo Corporation di Panama.

Despues ku na Sèptèmber último, Refineria di Kòrsou a permití e fuel oil drenta di kontrabanda den tankinan na Bullenbaai, a start un guera internashonal pa e fuel oil, pero tambe na Venezuela a kuminsá pèrsigui maneho di e kompania, United Petroleo Corporation. A bin resultá ku PDVSA a duna órden pa pèrsigui i detené operadornan di United Petroleo pa sakamentu di krudo klandestino for di Venezuela sin pèrmit di e kompania estatal petrolero.

United Petroleo Corporation (UPC), propietario di e fuel oil den tankinan di Bullenbaai, ta involukrá den un robo i desfalko kontra di PDVSA balorá na 435 mion dòler, kasi 800 mion florin. United Petroleo Corporation tabata e kompania ku via di Caribbean Petroleum Refinery di Kòrsou, Curaçao Refinery Utilities, Refineria di Kòrsou, KNOB Trading a logra saka fuel oil kontrabanda for di Venezuela i pone den tankinan na Bullenbaai.

Segun prensa venezolano, tras di e kompania UPC tabata in un teniente kolonèl a saka mas ku 500 mion bari di krudo for di PSVSA pa distribuí klandestinamente. UPC entretantu a debe PDVSA di Venezuela 800 mion florin lokual a kondusí na bankarota di e kompania  na Novèmber 2022. Dos luna promé na Sèptèmber 2022, UPC huntu ku RdK i demas kompanianan den e struktura a logra trese fuel oil ilegal for di Venezuela pa Kòrsou. Esaki sin e lisensianan nesesario. Na e momentonan aki tin sospecho ku tabatin diferente Kolonèl i Kolonèl Teniente involukrá ku United Petroleo Corporation i na Aprel 2023, detenshonnan a kuminsá kai na momento a arestá Antonio Perez riba 18 di Aprel di e aña aki. Tambe a keda arestá den e kaso Roger Ramirez Dorante Teniente Kolonel di e Akademia Militar Estatal di Venezuela. promé di a laga e kompania bati bankarota, a resultá ku miembronan den kuerpo militar ku rango haltu na Venezuela a uza e kompania pa saka krudo i derivadonan di krudo, na un manera klandestino for di Venezuela pa kometé desfalko kontra di e kompania. Unu di e kargamentunan, ku a partisipá na e entreganan di kontrabanda ta esun ku Refineria di Kòrsou i CRU di Kòrsou a partisipá na dje.

Na Kòrsou a surgi un bataya formal pa propiedat di e fuel oil. E grupo di Raul Soccoro, propietario di SOCAP huntu ku eks sosionan den Caribbean Petroleum Refinery a kuminsá bringa ku Erchenel Doran, kende tabata nan sosio lokal. E bataya tabata pa derechi riba e fuel oil kontrabanda den tankinan na Bullenbaai. Den e trayekto di sèn, a bin deskubrí un otro kompania panameño, bou di KNOB Trading ku tabata paga pa hür e alokashonnan na Bullenbaai. Pero bankonan a bin para tur transakshon di KNOB pa Kòrsou, debí na legitimashon ofisial di e fuel oil. A surgi despues dos intento di beslag ku korte a otorgá pa despues despensa tur embargo riba e fuel oil.

Konsekuentemente un kompania nobo a paresé pa claim e fuel oil. Ta trata di Lead Group, tambe di Panama. Lead a manda nan konsehero “top gun”, Fransisco Mancelli pa atendé e asuntunan riba e fuel oil. Mancelli a logra kombensé korte na Nieuwe Haven pa eliminá tur embargo riba e fuel oil pa nan por paga CRU e hür atrasá i asina bai ku 20 mion dòler balorá na fuel oil. Ayera, Lead Group mester a logra trese un kumpradó legítimo pa e fuel oil. Unabes bankonan aseptá e pago di e kompania legitimatisa, e fuel oil por sali for di Kòrsou. Sino, 1 di Novèmber benta di e fuel oil ta bai destaho públiko.