Lei Tin leinan na lugá ku ta konserní kasnan di hende grandi kai na Kòrsou, pero no ta kumpliendo ku kompromisonan di e leinan aki.

Willemstad, — Defensor di Pueblo i representante di Raad van Ouderenbeleid a duna un presentashon dia 10 di novèmber último na parlamento. For di esaki a bini dilanti ku tin leinan na lugá pa kumpli ku kuido di hende grandi, pero ku kompromisonan di plannan di pólisa no ta wòrdu ehekutá segun e leinan ta instruí.

Segun sr. de Lannoy, presidente di Raad van Ouderenbeleid, no ta kumpliendo ku e kompromisonan di e leinan ku tin na lugá pa loke ta trata kuido di hende grandi aki na Kòrsou. Presidente di Raad van Ouderenbeleid a indiká ku tin diferente kompromisonan ku no ta kumpli kuné pa asina atendé ku kuido na un manera strukturá na pais Kòrsou.

E situashon pa loke ta trata di kuido di hende, mester atendé kuné mas lihé posibel pasombra segun presidente di Raad van Ouderenbeleid,mester sa kiko ta sosodiendo na pais Kòrsou pa loke ta trata kuido di hende grandi. E kompromisonan ku no ta kumpliendo kuné komo pais na un manera strukturá ta konsistí di entre otro plannan di pólisa pa kasnan di kuido i kas pa hende grandi, kadernan ku guia ku ta midi nesesidat di kasnan di kuido na Kòrsou, i ehekushon di plan di pólisa AVBZ-beleid segun lei di Landsverordening AVBZ (1996).

Presidente di Raad van Ouderenbeleid a menshoná ku tin diferente leinan na lugá pa atendé ku kuido di hende grandi kual ta entre otro: Landsverordening AVBZ (1996), Landsverordening Zorginstellingen (2007), Eilandsverordening Bejaardenhuizen en Verzorgingstehuizen (2008), i Eilandsbesluit Kwaliteitseisen bejaardenhuizen en Verzorgingstehuizen (2008).

Presidente di Raad van Ouderenbeleid a kompartí ku ‘Landsverordening AVBZ’ (1996), ta lei ku ta duna entre otro fondo na hendenan ku mester di kuido, entre otro grandinan ku tin por ehèmpel un hèndikèp. E lei ta na lugá segun sr. de Lannoy,, pero falta un komishon ku ta konsistí di por lo ménos tres persona eksperto, por ehèmpel: un dòkter, un enfermera i un trahadó sosial.

Segun de Lannoy e komishon aki ta importante pa duna konseho na e órgano ku ta atendé ku petishon di kuido pa personanan grandi ku tin un hèndikèp. Pero sr. de Lannoy a indiká ku e komishon aki no ta tei. E plan di pólisa relatá na e lei aki di por lo ménos 3 aña, ku mester di adaptashon kada aña, i ku mester risibí aprobashon di e minister konserní ku kuido di personanan grandi, tampoko no tei.

Pa lokual ta trata e lei di ‘Landsverordening Bejaardenhuizen en Verzorgingstehuizen Curaçao’ (2008), e komishon nesesario pa aloká personanan di edat den un kas di hende grandi, i ku tambe mester duna konseho di e nesesidat di kapasidat di kas di hende grandi aki na Kòrsou, tampoko no ta sosodiendo segun sr. de Lannoy. Segun sr. de Lannoy, e plan di pólisa pa ehekutá kompromiso di e lei aki tampoko no ta sosodiendo.

Pues tin lei na lugá, pero mester bini gobernashon efektivo, i tambe kolaborashon, pa asina ehekutá leinan ku ta na lugá i strukturá kuido di hende grandi na pais Kòrsou.