Muryad de Bruin, ‘Juni’ Ignacio i ‘Manchi’ Harms, ayera durante di e rueda di prensa.

WILLEMSTAD—Kontentu na Sambil, ayera tabata esenario pa rueda di prensa, relashoná ku e di 2 edishon di e torneo di futbòl, pa streanan di pasado, ‘Legends Football Tournament Curaçao’. Ta trata aki di e edishon pa aña 2024, ku lo mira akshon riba fechanan 9 i 10 mei benidero,  na ‘Curaçao Airport Veneu’, situá enfrente di e Kuebanan di Hato.

https://www.facebook.com/VigilanteKorsou/videos/388290227371591 (Klik pa wak Rueda di Prensa)

Organisashon
Esnan tras di e evento, respektivamente Herman ‘Manchi’ Harms, organisadó, huntu ku Wilhelmus ‘Juni’ Ignacio (Curacao Airport Holding) i Muryad de Bruin (Ofisina di Turismo), tabata esnan na mesa, kende a kompartí informashonnan di e gran evento aki, ku prensa.

Huntu ku e trio ariba menshoná, tambe tabata presente Germain ‘Chulo’ Brunken, e bosero di e selekshon di e legendario futbolistanan di Kòrsou i tambe Ricardo Pita Corea, kende ta enkargá ku un torneo, ku tambe ta parti di e totalidat.

Spònsernan
E Torneo di Futbòl di leyendanan di Kòrsou ta ser ko-patronisá pa Curaçao Airport Holding, CWM Infrastructure, i ku kolaborashon di Ofisina di Turismo di Kòrsou.

E torneo
Lo bai ta torneo, unda ku Argentina, Brazil, Colombia, Hulanda i Kòrsou lo ta partisipando, ku diferente di nan mihó futbolistanan, ya veterano. Nan lo hunga riba un kancha ku lo wòrdu konstruí próksimamente, ku lo konta ku Edelgras, unda ku e ekiponan lo hunga ku un ekipo forma pa 5 hungadó, di kual un kiper. Lo bai ta enkuentronan ku lo dura 2x 15 minüt. Despues ku tur ekipo enfrentá otro, esnan ku mas punto, lo pasa pa semifinal, pa asina buska e finalistanan.

Legendarionan internashonal
Entre e futbolistanan legendario ku lo bai ta den akshon na Kòrsou, e  ekipo di Brazil lo konta ku entre otro Romário de Souza Faria, Ricardo Rocha i Paulo Sergio.

E selekshon di Colombia lo konta ku entre otro kiper Rene Higuita, Carlos ‘El Pibe’ Valderrama i tambe Faustino ‘Tino’ Asprilla.

For di Argentina lo tei Sergio Goycochea, Ariel Ortega i Leonardo Rodriguez entre otro.

Clarence Seedorf, Patrick Kluivert i Aaron Winter, lo ta esnan pa enkabesá e selekshon di Hulanda.

Nos legendarionan
Kòrsou su ekipo lo konta ku direkshon tékniko di e 2 legendario téknikonan den futbòl lokal, kende ta Norman ‘Nooi’ Girigorie i Henry Caldera.

Kòrsou lo konta ku kipernan Ivan Hansen i Ingemar ‘Inchie’ Pieternella.

Mientras ku futbolistanan Curley ‘Keke’ Poppen, Sharlon ‘Lonchie’ de Windt, Elvis ‘Kuchie’ Janga, Darryl Dorothaal, Marelvo ‘Toy’ Felomina, Eugene ‘Djege’ Martha, Raymond i Herbert Lucas i Rogelio Sambo, ta kompletá e ekipo lokal.

Entrada
Entrada ta kosta Naf 65,00 florin pa persona pa anochi pa adulto, ku un tarifa redusí di Naf 35,00 florin pa muchanan te ku 15 aña pa dia. Tambe tin package pa tur dos dia disponibel pa Naf 115,00 (adulto) i Naf 55,00 (muchanan).

Además di esei, tin un sekshon VIP eksklusivo disponibel pa Naf 250,00 (pa dia) òf Naf 450,00 (package) pa persona.

Riba e tereno tin kuater tipo di tribuna disponibel: tribunan kòrá, hel i blou i e plataforma VIP. Bishitante tin e posibilidat pa kumpra entrada pa kada tribuna. Karchi ta optenibel for di awe via legends.curacao.com. Mientras ku seguidamente tambe lo tin karchi optenibel na Van Den Tweel, Mensing’s Caminada, Ticketpoint Zeelandia, Bugs Bunny i tur 31 punto di benta di Sentro di Pago & Tu y Yo.

“The Champions Mini Football”
Ricardo di su banda ta enkargá ku un torneo, ku ta inisiá djasabra dia 4 mei 2024, riba e kancha ariba indiká. Esaki bou di nòmber “The Champions Mini Football’. repartí den kategorianan 30+ i 50+, unda e finalnan lo hunga riba e fecha final di e torneo ariba menshoná, dia 10 mei 2024.

Den 30+ e siguiente futbolistanan lo traha nan ekipo. Ashar Bernardus (Real Madrid), Luidjino Hojer (Manchester City), Gersinho Constansia (Liverpool) i Glencienne Gregoria (Barcelona).

Mientras ku den 50+, lo kompetí Jong Colombia (Barcelona), Bonam (Bayern Munich), De Sterren (Real Madrid) i De Koning (PSG).