WILLEMSTAD – Kontraloria General a investigá i aprobá e kuenta anual di Landsloterij, esta e kuenta di entrada i gastu, pa loke ta trata e añanan 2010 pa 2018. I den su rapòrt di ayera a splika di tin un insertidumbra tokante Landsloterij su kapital propio segun e kuenta anual di 2018.

Pasó Landsloterij a eliminá debe na balor di 18,3 mion florin na ‘zegelbelasting’ i ‘vergunningsrecht’ for di den su atministrashon, sin un aprobashon di Parlamento. No tin un desishon di Minister definitivo tampoko. A hasi esaki despues di anunsio di Minister di Finansa Javier Silvania tokante kobransa di impuesto di 2017 i promé.

Na promé lugá Kontraloria a konstatá ku e kuentanan anual di 2010 te ku 2017 ta duna un bista konfiabel i eksakto di e kapital na fin dje añanan ei i di e resultado finansiero. A base di esei, Kontraloria ta aprobá e kuentanan anual ei. “Kontraloria tin un insertidumbre tokante konfiabilidat i eksaktitut di Landsloterij su kapital propio segun e kuenta anual di aña 2018. E insertidumbre ta basá riba e echo ku Landsloterij a eliminá debe na balor di NAf. 18,3 mion relashoná ku impuesto di seyo (zegelbelasting) i derecho di pèrmit (vergunningsrecht) for di den su atministrashon. Nos no por bisa ku siguransa ku e prinsipio di kadukashon di debe a ser apliká korektamente, ni si lo tabatin mag di eliminá e debenan sin ku nan a kaduká.”

Ta e aña akí numa Landsloterij a hasi un apelashon pa kadukashon di e debenan ei. Hunta di Supervishon i Konseho (RvTA) a bai di akuerdo pa entregá e petishon di kadukashon debí ku dia 14 di novèmber 2022, Minister di Finansa Javier Silvania a anunsiá ku mas di 473 mion na impuesto imponé promé ku 2017 lo kaduká outomátikamente i lo bira no kobrabel sin ku ta nesesario pa apelá formalmente na kadukashon. “No tin un desishon di Minister ni un aprobashon di Parlamento pa kanselashon di e debe akí di Landsloterij serka Pais. Entretantu, Ministerio a eksigí Landsloterij pago di un debe habrí di e periodo di 2018 padilanti na balor di 4,6 mion. Pa e periodo di promé ku 2018, no a emití niun òrdu di kobransa. Tanten ku Minister no tuma un desishon definitivo tokante e petishon di Landsloterij, partisipá e desishon ei na Landsloterij i regla e kanselashon formalmente, Kontraloria lo keda ku un insertidumbre relashoná ku e kuenta anual di 2018.”

Segun Kontraloria no a kumpli ku tur e disposishonnan ku por kontribuí na legalidat finansiero den e kuentanan anual. Esei ta bini padilanti den e echo ku, Parlamento no a aprobá niun di e presupuestonan ni a adoptá esakinan mediante dekreto nashonal. E último presupuesto ku Parlamento a adoptá pa medio di un dekreto nashonal ta esun di 2007. Debí na esei, no por a konfirmá ku tin base legal pa e gastunan ku Landsloterij a hasi ni pa e maneho ku el a hiba den e añanan en kuestion. Tambe ta un echo ku den pasado, Minister a redusí e depósito pa kada lòt ku 75 sèn, pa asina e rebendedónan por a kobra 75 sèn èkstra di komishon. Sinembargo, nunka no a formalisá e adaptashon akí di e depósito pa medio un dekreto nashonal di medida general manera lei ta preskribí. Debí na esei, den e añanan investigá, a paga e rebendedónan un total di aproksimadamente 3,3 mion indebidamente i esei ta nifiká ku Landsloterij a kobra e suma ei di ménos na depósito.

Otro echo ta ku e depositario pa Sint Eustatius no ta nombrá pa medio un dekreto nashonal. Nombramentu di e depositario ta basá solamente riba e aprobashon di Konseho di Minister. Tambe ta menshoná e echo ku e kompensashon mensual di gastu ku e depositario di Oranjestad a risibí pa mayoria di e lunanan di 2018 no ta kuadra ku e suma di kompensashon preskribí. Komo konsekuensia di esei, e surplus ku a paga e depositario no ta konforme lei. Finalmente, pa e periodo di 28 di mart 2014 te ku 2018, Landsloterij a apliká un skema di preis ku no tin base hurídiko. Na 2020, a koregí e ilegalidat akí posteriormente, ora e skema di preis usá a keda adoptá retroaktivamente mediante un dekreto nashonal di medida general dia 28 di mart 2014.