AMSTERDAM—Organisashonnan di bon kousa manera asosashonan deportivo i iglesianan lo tin menos molester di investigashonnan di banko.

Ta trata di investigashonnan di banko den risiko riba labamentu di plaka of finansiamentu di terorismo, segun reglanan nobo di asosashon di bankonan hulandes (NVB). Den ultimo añanan tabata difisil pa organisashonnan di bon kousa pa hasi transakshonnan ku bankonan pa motibu di investigashonnan severo di klientenan pa por kumpli ku reglanan anti-labamentu di plaka. Bankonan a tuma míles di personal ekstra pa hasi e trabou. Organisashonnan di bon kousa hopi biaha ta fundashon of asosashon. Ta huridikshonnan atraktivo pa laba plaka. Nan tin obligashonnan di transparensia limita i no semper nan mester publika relatonan anual. Investigashon di klientenan intensivo por subi nan gastunan atministrativo i por dura hopi pa haña aprobashon pa un kuenta di banko. Ku e reglanan nobo bankonan kier mihí balanse, fuerte kaminda ta nesesario i fleksibel kaminda por. Den prosedura nobo di NVB ta menshoná faktornan ku por limita e risiko riba labamentu di plaka. Ta trata di entre otro di transparensia riba finansa pa publika relatonan tur aña i buska un instansha ku ta aprobá i kontrolá instanshanan di bon kousa. Traha den un pais ku sanshonnan ta ser konsiderá komo faktor di risiko haltu. Ku e prosedura nobo NVB ta spera di tin mas atenshon pa e situashonnan aki. NVB ta enfatisá e importansia di fndashonnan di bon kousa den komunidat i ta anunsia ku ta bai desaroyá reglanan nobo tambe pa otro sektornan di risiko manera kompanianan di outo i crypto.