Representantenan di DOS/OSBOD i di e ministerionan ta firma Proyekto di ‘Learning Inside Job’

Willemstad,– Ayera den oranan di mèrdia tabata tin firmamentu pa kuminsá ku trayekto di edukashon pa e klientenan ku ta sintando nan detenshon den SDKK.

E plan ta pa duna 192 kliente den SDKK risibí edukashon riba nivel 1 di SBO. Bestür eskolar DOS, a menshoná ku tantu minister van Heydoorn komo minister Hato, a demonstrá nan interes den importansia di e kolaborashon i tambe e importansia di edukashon den vários lokalidat. Reginald Römer, direktor di DOS/OSBOD, ta kontentu ku por ofresé enseñansa tambe den lokalidat kaminda tin e nesesidat di esaki. Minister van Heydoorn a menshoná ku pronto den práktika lo mira e kursonan tuma lugá den e sentro. Minister van Heydoorn a menshoná ku lo bai sigui traha pa diversifiká enseñansa. Tambe e minister a indiká ku no mester mira edukashon solamente den edifisionan di skol, pero tambe na otro lokashon. Di e manera aki ke hasi esaki edukashon aksesibel.

Richenald Ricardo kende ta direktor di SDKK, a menshoná ku e ta sumamente kontentu ku minister Hato a pone alrededor di 1 mion florin i esaki ta djis un parti di lokual ta bai hasi ku e proyekto ‘Learning Inside Job’. E proyekto ‘Learning Inside Job’ ta konsistí di estudionan práktiko, edukashon, estudio própio,  i tambe formashon sosial. Tambe e direktor a indiká ku e ta bai hasi invershon den infrastruktura pa asina riba tèrmino largu por traha riba parti di e resosialishonan di e blòknan. E meta ta pa tin mas tantu partisipashon di parti di klientenan di SDKK.