Wilemstad, — Minister Hato a skucha e yamadanan di mayornan den komunidat i ta den proseso final pa ratifiká e ‘’Haags kinderontvoeringsverdrag’’ (e Tratado di La Haya ku ta regla e sekuestro internashonal di mucha).

E meta prinsipal di e tratado ta pa reestablesé e status quo pues e regreso di e mucha na su pais di residensia promé ku e traslado of sekuestro. Esaki ta sentra riba e protekshon pa derechinan di kustodia ku sa wòrdu interumpí dor di kita e mucha for di su kustodiante. E tratado tey pa deskurashá i prevení mayornan di skohe sekuersto di nan yunan komo solushon pa problemanan relashonal/familiar. Ta papia di sekuestro den sentido di e Tratado, na momento ku esun mayor sin outorisashon di e otro mayor, bai biba den un país ekstranhero ku un yu menor di edat.

Riba proposishon di Minister Hato Konseho di Minister a bai di akuerdo awe, 5 di aprel pa Kòrsou inisiá e proseso di ratifikashon di e Tratado importante aki. Aworaki e tramitenan ofishal diplomátiko a ser inisiá pa e Tratado keda ratifiká pa Pais Kòrsou tambe. Ta ferwagt ku e proseso aki lo keda kla promé ku fin di aña 2023.