PUNDA,– Ayera Gobièrnu di Kòrsou a tene un Relato di Dia ku tópikonan ”Plan di seguridat di fin di aña” i “Vakaturanan”.

Durante di e relato di dia aki a hiba palabra minister di hustisia Shalten Hato, hefe suplente di kuerpo polisial Kòrsou i Jules Ilario i hefe di prosesonan interno Elbert Sambo .

Minister Hato a splika ayera ku gobièrnu kier un fin di aña i un kambio di aña sigur i p’esei resientemente a bini huntu den e “driehoeks overleg”, pues ministerio públiko, kuerpo polisial i minister pa por atendé un plan di akshon pa fin di aña, Tambe minister a splika ku nan a para ketu na un kampaña di konsientisashon kaminda kuerpo polisial ta bai duna guia i informashon na nos pueblo. Esaki mirando ku kuerpo polisial ya a lansa un kompaña ku ta dunando fruta, esaki paso último añanan por a tuma nota ku atrako i ladronisia ta subi hopi den fin di aña. Señor Hato ta splika ku e  kampaña nan di konsientisashon ta pa informá nos mes, pa kuida nos mes i nos propiedatnan. Tambe minister a splika ku ya a kuminsá ku un kampaña di akshon riba kaya pa asina protehá komunidat den fin di aña i durante kambio di aña. E titular di hustisia a bisa ku por a tuma nota ku den novèmber kuerpo polisial di un forma stratégiko ta kontrolá den tráfiko. E ta sugerí pa outomobilista nan baha velosidat, bisti bo faha di seguridat i si bo ta stür no bebe i si bo bebe no stür.  Tambe Hato a splika ku nan a para ketu na e echo pa tin mas personal riba kaya pa por sirbi i protehá i p’esei a akordá ku lo aserka VKC i Marina pa bin duna un man den fin di aña. E akuerdo aki a keda sera ku minister di defensa di reino pa marina por duna un man i tambe VKC.

Minister a invitá un i tur ku kier forma parti di kuerpo polisial pa solista pa un di e funshon nan ku ta habri, bira polis pa yuda bo pais. E ta hasi yamada tambe na tur hende pa ban tene mas kuenta ku otro i ban biba na pas, ban kore outo ku koutela, tene bo mes na reglanan di tráfiko i pasa un felis fin di aña.