WILLEMSTAD,– Minister di hustisia Shalten Hato ta bisa ku nan no a spera ku 5000 hende lo a bin pa buska trabou i ku esaki ta nifiká ku hopi hende mester di trabou.

E minister ta bisa ku di parti di ministerio di hustisia nan ta kontentu i ku hopi hende a presentá pa sera konosí ku e departamentunan ku ta kai bou di hustisia i aparte di esaki e parti di e trabou. E ta bisa ku tur organisashon a duna informashon di e vakaturanan ku tin habri i a duna oportunidat pa e proseso di solisitut. E interes tabata hopi haltu for di ora a habri porta i por a tuma nota ku mesora a bira drùk. Tambe e minister ta yama danki na minister van Heydoorn ku a manda bus pa buska muchanan di skol pa nan por a haña informashon. E ta bisa ku tur “boot” tabata drùk i tambe e charlanan tabata bon bishitá i a duna fruta kaminda a sa di duna diferente informashon i sifra riba e tereno di prevenshon. Pues e ta splika ku e dianan aki a surpasá tur espektativa i no a spera tantu interes i tantu pregunta asina. Esaki ta nifiká ku e motibu ku a hasi esaki tabata pa e komunidat i nan a respondé pa asina sera konosí ku hustisia.

E minister a splika ku e parti ku tabatin mas interes pe ta Balie Medewerker na servisio di atmishon kaminda a pasa mas ku 300 solisitut.

Tambe minister Hato a splika ku tabatin kuater organisashon ku no tabata parti di e wepsite, paso nan mes tin nan wepsite i pues e sifranan di e kuater organisashonnan aki minister no tin. Un total di aplikashon di mas ku 5000 pues e interes pa fortifiká e kadena hudisial ta hopi haltu. Tambe tin hendenan ku tin trabou kaba ku kier un kambio den nan bida òf ku kier fortifiká e kadena hudisial. Pues e ta bisa ku no por bisa ku e kantidat di hendenan ku a apliká ta hendenan ku no tin trabou, paso tin di nan ku ta trahando pero ku kier kambia di trabou.

Hasta e ta bisa ku kisas tin hasta hende ku ta traha den e propio organisashon ku kier hasi un kambio di funshon, pues no ta asina ku ta tur hende ku a solisitá ta hendenan sin trabou. Pero all by all e interes tabata hopi haltu i minister ta kontentu ku a brasa hinter e evento aki.