WILLEMSTAD – Presidente di Parlamento Charetti America-Francisca a plania un asina yamá “ora di pregunta” (“vragenuur”) ku Minister di Hustisia Shalten Hato awe mainta tokante maneho i lei di kachónan peligroso. Konforme e invitashon, lo trata e “ora di pregunta” tokante transporte eskolar promé, ku ta planiá pa start 11’or di mainta.

E “ora di pregunta” tokante e animalnan ta konvoká riba petishon di Parlamentario Ramón Yung, ku a manda su karta ku un kantidat di 15 pregunta djaluna último. Konforme su splikashon, komunidat di Kòrsou últimamente un biaha mas a konosé kasonan lamentabel den kua kachónan peligroso tabata e protagonistanan prinsipal. “Den luna di ougùstùs kachónan peligroso a ataká un dama den bario di Jongbloed na momentu ku e tabata riba kaminda pa bai trabou. E víktima a sufri mordénan serio, pa kua e mester a keda interná den hòspital pa tratamentu i rekuperashon. Resientemente kachónan peligroso a drenta un kriadero di galiña, kaminda nan a masakrá no ménos ku 700 galiña i tambe 400 puitu. Den pasado tabatin otro kasonan sumamente lamentabel ku a tuma lugá, a base di kua a bin ku un Lei pa atendé ku kachónan peligroso. Den 2020 tambe tabatin un insidente na Koredor den kua kachónan peligroso a ataká i morde un otro kachó mata.”

 E diferente insidentenan ariba menshoná a pone ku atrobe ta reina un preokupashon grandi den komunidat pa loke ta trata kachónan peligroso. Kada siudadano den e pais akí tin e derecho di por move i trafiká trankil riba kaya, sin mester tin temor di por bira víktima na man di un òf mas kachó peligroso. “Teniendo kuenta ku bienestar di komunidat generalmente, pa medio di bo persona, nos ke pidi pa invitá Minister di Hustisia Shalten Hato na un “vragenuur” di manera ku komunidat por haña un splikashon i aklarashon riba e maneho ku ta hiba pa loke ta trata e Lei di kachónan peligroso. Pa e Minister por prepará pa e “vragenuur”, nos ke dirigí e siguiente preguntanan na Minister di Hustisia Shalten Hato, pendiente e “vragenuur”.”

Na promé lug’a e ke sa si Minister Hato a tuma nota di un kaso lamentabel ku a tuma lugá dia 12 di ougùstùs na Jongbloed den kua kachónan peligroso a ataká i morde un dama malamente. I si esei ta e kaso, kua ta e pasonan ku el a tuma den e kaso spesífiko akí. Tambe e ke sa si Hato a tuma nota tambe dje kaso riba e anochi di 3 pa 4 di novèmber den kua kachónan a masakrá un kantidat di 700 galiña i 400 puitu. I si den e kaso akí, e por konfirmá ku ta trata di un kaso penal. “Kua ta e diferente pasonan ku Minister a tuma den kaso akí? Minister por konfirmá ku den e kaso akí ta trata di kachónan peligroso ku ta deskribó den e Ordenansa di Kachónan peligroso?”

Dispensashon

Yung a konstatá ku e Lei di kachónan peligroso ta preskribí ku mester duna dispensashon na momentu ku ta kria kachónan peligroso. E ke sa ta basá riba kua kriterio ta duna dispensashon pa un siudadano por kria kachónan peligroso. “Den kaso dje masakre, ku ta trata di kachónan peligroso, ta trata di kachónan ku tabata registrá komo tal? Den kaso ku ta trata di kachónan registrá, kua ta e kriterionan bou di kua un persona por kria e kachónan peligroso akí den un bario abitá? Den kaso ku un siudadano no mantené su mes na e kondishonnan mará na e Lei di kachónan peligroso, kua ta e sanshonnan ku por òf ta apliká ora violá òf falta ku e kondishonnan akí?”

Ehekushon

E Parlamentario a para ketu tambe na mantenshon di òrden públiko i ke sa kiko ta hasiendo pa loke ta trata ehekushon dje Lei ku ta regardá kachónan peligroso. “Den kaso ku un kachó peligroso no registrá kousa daño na un persona, Minister por splika kua ta e kaminda ku hustisia lo kana? Minister por splika ku hustisia logra identifiká doño di kachó peligroso no registrá ku kousa daño na un persona, kua ta e pasonan ku lo tuma kontra e doño dje kachó peligroso no registrá? Minister tin un plan pa bin ku akshon i kòntròlnan preventivo pa loke ta trata kachónan peligroso? Minister tin un registro dje diferente kasonan den kua tabatin kachónan peligroso embolbí i kiko tabata resultado dje kasonan akí?” Esaki ta tur e preguntanan ku Minister Hato a haña pa kontestá personalmente awe mainta den sala di Parlamento.