WILLEMSTAD – Resientemente Minister di Hustisia Shalten Hato a reuní henter dia ku tim di maneho di “Uitvoeringsorganisatie Brandweer & Rampenbestrijding Curaçao” i a yega na diferente palabrashon i puntonan pa mehorashon konkreto. Ta trata akí di tur kazèrne, inkluyendo esun di Barber ku e Minister a bishitá djaweps último i a konstatá diferente punto di doló dje personal ku ta laborá aya na Bándabou.

Durante su spich dia di tratamentu di Presupuesto 2024, ya Minister Hato a anunsiá algun plan. El a informá Parlamento ku na Brantwer su Ministerio a sòru pa implementashon di e plan di fortikashon di brantwer den kua ta bai atendé ku e siguiente 5 áreanan di atenshon: “Organisashon i funshon”, “Areglo di posishon hurídiko”, “Sistema di formashon profeshonal”, “Lei i regla”, i “Plan di komunikashon interno i eksterno”.

Hato a sigui informá ku: “Pa ku personal di brantwer nos a hasi vários kos manera: tuma 25 hóben aspirante bombero den servisio; nombra un komandante nobo; i tambe kontinuá ku invershon den personal dor di duna training/seminario di entre otro energia transitorio. Pa ku material pa loke ta regardá Kuerpo di Bombero a remplasá “luchtcompressor”, pòmp di aparato di “perslucht”, a kumpra dos pikòp, bùs pa transportá personal, vehíkulonan modèl SUV, telefònnan pa hefe na warda, a kumpra  “warmtebeeldcamera’s” i “afstandmeetinstrument” pa tèst vuurwerk, iPads i muchu mas. Pues nos no a para ketu den 2023.” Asina e Minister di Hustisia a splika Parlamento. Awó e ta informá pueblo di ta hasiendo mas, despues di su bishita na tur kazèrne i resientemente na Barber, kaminda a konstatá diferente aspekto ku mester mehorá.