Muchu hùiswèrk por afektá desaroyo di nos hubentut. 

Willemstad, — Univeristy of Curacao (UOC) ta investigá  pa promé biaha huntu ku Fundashon Fair Educational Chance Curacao (FFEC), i Rijksuniversiteit Groningen (RUG) tokante di e preshon di hùiswèrk aki na Kòrsou riba muchanan i mayornan. A presentá e resultadonan di e investigashon den un simposio.

Segun Dr. Odette van Brummen-Girigori, un sikólogo di desaroyo sosial i personal, mayornan a duna hopi reklamo tokante e kantidat di hùiswèrk ku ta duna muchanan. Segun Sra Odette e kantidat di hùiswèrk ta demasiado haltu i tin efektonan negativo riba hóbenbnan pero tambe mayornan.  E preshon di e kantidat di hùiswèrk ta resultá den strès pa mayornan pero tambe ta krea emoshon nan negativo pa muchanan. Muchanan por sinti strès, tristesa i demotivashon ora ku e kantidat di hùiswèrk ta afektá otro aktividatnan komo por ehèmpel deporte. Muchanan ta haña nan ta skohe entre e aktividatnan ku nan ta tene nan mes bezig kuné òf ta laga esakinan kai pa motibu di e kantidat di hùiswèrk ku ta duna.  Sra Odette a menshoná ku e kantidat di hùiswèrk no mester stroba muchanan práktika deporte. Deporte ta un aktividat ku tambe ta di importansia pa desaroyo di mucha ya komo e tin impakto positivo riba desaroyo mental.

Sra Odette ke pa tene kuenta ku e efektonan ku e kantidat di hùiswèrk tin riba e abilidatnan kognitivo di e muchanan. Segun sra Odette un mucha di skol di fundeshi no ta madurá kompletamente ainda. Ora duna tarea na muchanan mester tene kuenta ku e mucha mester por regulá e kantidat di informashon ku e ta haña. Tambe mester konsiderá e manera kon ta tèst e muchanan na skol. Muchanan mester di tempu pa kòrda informashon pa apliká esaki den un tèrmino kòrtiku.

Sra Odette a indiká ku e situashon di hùiswèrk aki na Kòrsou ta unu preokupante tantu komo pa e muchanan komo pa e mayornan. Segun Sra Odette mester introdusí métodonan pa asina por sostené tantu e mucha komo e mayor ku ta yuda ku hùiswèrk. Susan Larmonie van Heydoorn di Ministerio di Enseñansa, Kultura i Deporte ku tambe tabata tei presente na e simposio, a menshoná e importansia di e investigashon ku a wòrdu hasí. Esaki lo kontribuí na e regulashon ku ta wòrdu kreá dor di e ministerio pa asina por bini ku medidanan pa atendé ku e asuntu di e preshon di hùiswèrk.