Huntu: Jeanne Herniquez e motor tras di Museo Tula ta kana ku Lisette Sambo drentando kurá di Lanthùis Kenepa.

Kenepa—Ayera mainta, den bario di Kenepa, Museo Tula Nobo a habri su portanan ku un bunita seremonia tradishonal, kultural i históriko. Den seno di invitadonan ku a yega lanthùis Kenepa, e fundashon FMK, Fundashon Museo Tula, ofisialmente ta habrí pa públiko.

E seremonia a inisiá ku un marcha di entrada kòrtiku kompania ku muzik di Tambú,  unda invitadonan a kana drenta kura di lanthùis pa afirmá i reklamá poseshon di e lanthùis komo e kas pa museo Tula. Despues di e kana un rònchi den kura, invitadonan a drenta e lanthùis pa patras den pòrch, por a asistí na e seremonia i presentashon.

Promé di a pasa pa e diskursonan ofisial a tuma un ritual presentá pa Rosemarie Sling, Celsio Martha, Cynthia Sluis i Jeanne Henriquez. Esaki tabata un obra di arte, kual a risibi un alokashon den unu di e kambernan na e Lanthùis.

Despues di e bunita ritual a sigui e parti di diskurso. Presidente di e fundashon sr. Shurbey Alberto a hiba e diskurso inougural mustrando riba importansha di e museo miéntras e hóben Christopher Rosinda a splika e importansha pa hóbennan di Kòrsou ta konsiente di Tula. Despues di e diskursonan a sigui entrega di plakat na diferente baluarte i personanan kende a yuda e museo den pasado i presentá, spesialmente Jeanne Henriquez i Lisette Sambo.

Finalmente den oranan tempran di mainta tabatin rekorido den e Lanthùis pa mustra invitadonan.