Segun mr. B.Niks, no ta tur kaso di ponementu di “fever” ta meskos

Nieuwe Haven: Segun fiskal mr. B.Niks, no ta tur kaso di butamentu di “fever” ta meskos. Esaki e fiskal a bisa komo reakshon riba e remarke ku abogado mr. Rooijer a hasi kaminda e abogado ta bisa ku e no ta komprondé kon OM ta midi i ku segun e abogado, OM ta midi ku dos midí. E abogado a menshoná diferente kaso kaminda polisnan a gara hende ta pone “fever” pero ku nan outonan no a keda konfiská i ku nan a haña solamente but.

Fiskal mr. Niks a splika ku tur kaso ta diferente i den nan demanda, OM ta tene kuenta ku diferente faktor. Manera por ehempel, unda e persona a pone “fever’’ ku su vehíkulo, ku tabatin personanan rondó den e area ku konsekuentemente ta trese peliger kuné, di kuantu biaha e persona a keda gará ta pone “fever”, kuantu ta e balor di e vehíkulo ku e persona ta manehá i diferente otro faktor.

Fiskal a bisa ku e ta bon konosí ku e ehèmpelnan ku abogado mr. Rooijer a trese dilanti. Pero e kasonan ei no ta di kompará ku e kaso aki. Segun fiskal, riba video por a mira klaramente kon e konduktor di e bròmer kual ta Jamier Eduarda a disidí di pone “fever” riba kaya Rignald Recordino dia 29 di desèmber 2022. Segun fiskal den e kaso aki, Eduarda a para tráfiko i a disidí di pone “fever” kaminda tabatin hende ta para wak i tabatin asta hende sintá. Esaki tabata un situashon hopi peligroso. Un persona ku tabata sintá kant’i kaminda a skapa pa wowo di angua.

Tambe fiskal a bisa ku Trinidad ku ta pretendé di ta doño di e bròmer, no tin niun prueba apart di su “keuringskaart” ku ta sostené loke e ta bisa. Tur kos ta indiká ku e bròmer ta di Jamier Eduarda i komo e no tin “reibeweis”, el a disidí di laga Trinidad pone esaki riba su nòmber.

Loke sigur tambe ta hunga un ròl segun fiskal, ta e echo ku ounke e bròmer ta di Trinidad, el a skohe pa laga Eduarda ku e bròmer, sabiendo ku e no tin “reibeweis” i sabiendo ku e ta un persona ku gusta pone “fever”. E sa ku Eduarda ta asta pone “show di fever” ku e bròmer i ku e ta hasi esaki asta den eksterior kontra di pago. E bròmer su tayer patras tin un ekstenshon pa hasi e bròmer mas largu. Esaki ta speshal pa bròmernan ku ta pone fever kuné. Pues Trinidad ta bon konsiente ora el a “fia” su amigu su bròmer, kiko e amigu tabata kapas pa hasi ku esaki. Trinidad mes a bisa esaki durante tratamentu di e kaso, segun fiskal. Pues ta un riesgo ku e mes a tuma i e mester asumí e konsekuenshanan.

Teniendo kuenta ku tur e puntonan ariba menshoná, fiskal a pidi wes mr. Edelenbos pa ratifiká e desishon di korte di promé instansha. Esta konfiská e bròmer i bende esaki riba findishi i tur suma ku keda pagá pa e bròmer ku ta riba 1000 florin, mester keda entregá na Trinidad.