Den kuadro di Dia Internashonal di Hende Muhé, nos a sostené un entrevista ku un hóben profeshonal i aktual polítiko Germone de Lima. Un muhé ku a mustra hopi kurashi i amor pa nos pais último añanan. Nos tabata kurioso pa sa kiko e dia aki ta nifiká pa e. Nos a sali inspirá dor di un muhé di e generashon hóben di luchadó, ku kurashi i sin miedu. Si bo mester di inspirashon awe òf un simpel rekordatorio ku bo tambe tin balor i e speransa ku bo tambe lo por alkansá tur bo soñonan, e ora ei e entrevista aki ta pabo.

Q.Dikon ta asina importante selebrá Dia Internashonal di Hende Muhé?
A.Pa ningun hende ta sekreto ku durante historia hende muhé mester a lucha pa haña sierto nivel di igualdat. I mi no ta referí na igualdat den pago so, pero e lucha di te awe pa igualdat di oportunidat. Aki na Kòrsou tambe ainda si bo wak bon tin faktornan ku ta stroba un muhé di alkansá su potensial kompleto. Mi ta konvensí ku pa nos pais por progresá di bèrdat, nos mester krea oportunidat igual pa hende muhé. 8 di mart ta un oportunidat pa konmemorá nos ròl den komunidat i kòrda otro riba e lucha ku mi generashon tambe tin ku sigui hiba pa yega einan.

Q. Bo ta bisando ku hende muhé ta mihó ku hende hòmber?
A. No, apsolutamente ku no. Nos ta igual i pa esei mes ta importante pa nos tin oportunidat igual pa desaroyá. Lo bo kere mi bisabo ku te awe tin dunadó di trabou ku ta kita hende muhé na estado for di trabou? Òf ku ta sinta evaluá si tuma un muhé na trabou, pasobra e ta un mama soltero i ta pensa ku e muhé ei no ta bai tin e fleksibilidat kisas pa e trabou? Ta situashon ku ma eksperensia den karni propio i hende serka dimi tambe. Maske tin bia ainda riba papel kos ta mustra igual, den praktiká tin hopi pa hasi. I ami Germone ke kontribuí.

Q.Kon bo ke kontribuí na e bienestar pa e hende muhé?
A. Entre otro ta pesei ma disidí di drenta polítika. Paso pa nos yega na e Kòrsou ku nos tur ke, nos mester realisá ku nos mester di hende muhé ku kurashi i sin miedu ku por wak bida di forma ophetivo i sali dilanti pa e otro. Nos komo muhé tambe mester ta sinta na e mesa ei ora di tuma desishon. Nos mester por kai sinta na e mesa di desishon, sabiendo kiko tur mas mester keda hasi pa drecha nos pais. Por ehèmpel, mi no ke djis representá e mama yong ku ta lucha pa kria su yu i ta sinti ku e no tin otro opshon ku no ta stòp di studia pa e bai traha. E mester tin oportunidat! Mi ke kai sinta na e mesa kaminda mi por pone preshon efektivo, pa yuda e mama ei haña e oportunidat di  kaba e skol ei pa aki 10 aña e i su yu ta mihó para.

Q.E eskoho nan di bida ei no ta algu personal di e muhé?
A.Klaro. Tur muhé ta liber pa skohe. Ta esei ta e punto. bo mester tin oportunidat igual pa skohe, pero tambe un sosiedat ku ta stimulá e muhé skohe loke por yud’e ta independiente i felis riba término largu. Mi ta hopi konsiente di e lucha nan aki. No lubidá ku mi mama mes, ta ku sosten di famia por a bai sigui studia pa duna ami i mi ruman un mihó bida. Komo mucha ma krese algun aña ku mi mama den eksterior pa e logra esaki. Mi por papia ku outoridat paso ta parti di ken mi ta. Pesei mi ta insistí ku fondonan mester keda mihó aloká pa stimulá hende muhé ta doño di nan futuro. Ku òf sin yu. Pa hasi nan eskoho konsiente dor di mira ku tin oportunidat pa nan tambe bai dilanti.


Q. Ki ròl e hende hòmber tin den esaki?
A. E hende hòmber mester ta nos aliado.Ta di muhé nan tambe ta bini tòg? Ta importante nos kria nos yu hòmber pa e sa ku mester respetá e ser muhé. Un hende muhé no ta su pertenensia. E mester sa ku mester tin balansa den kas. Ta tempu pa nos realisá ku agreshon i sintimentunan machista hopi bia ta for di sírkulo visioso kaminda e mucha a krese i ta esei e la mira. Di otro banda tambe asta den kas ku pas, nos ta malkustumbrá nos yu hòmber. Nos ta pensa e ta rei di kas i malkustumbrá ku e por hasi kiko e ke. Sin bo sa e ta haña e pensamentu ku e muhé mester limpia i kushina manera mi mama a hasi pami. Mester siña e mucha ku e muhé i hòmber ta pareu anto ku sòru otro no ta nifiká ku un ta mihó ku otro.

Q. Bo kemen situashonnan di violensia doméstiko ta sali for di esaki?
A.Bo sa, esei ta algu ku ta yega profundo na mi kurason. Den un relashon anterior mi a pasa den violensia doméstiko. Ainda e ta duru papia ariba, pero mi ta kompartí paso tin hende ku lo lesa esaki ku mester sa ku e por pasa bo tambe. Anto tin hopi kos pa kambia i atendé mas serio. Dia ku mi a yama outoridat, mi mester a tende di polis ku tami mes ta buska. Nunka di mi bida lo mi lubidá. Bo ta maginabo kon desampará bo ta sintibo? Ku hopi kurashi ma sigui pusha i sali afó. Pero bo mester di otronan pa yudabo. Mas muhé ku lo bo kere a pasa aden. Kuantu muhé no ta asta pèrdè nan bida, kaminda nan a pidi yudansa. Mi ke aportá na yuda. Sigur awor den krísis ku pais ta enfrentá ku ta prueba kaba internashonal ku violensia doméstiko a subi.

Q.Ki mensahe bo ke duna por último na komunidat?

A.Mi ke pa e muhé i hòmber komprendé ku 8 di mart ta di nos tur. Ku Dia Internashonal di Hende Muhé ta pa kòrda nos kuantu a keda hasi kaba, pero tambe kuantu mas mester sosodé. Ami ta kla pa ta un luchadó pa e muhé, pa e mama i ku esei tambe pa e hòmber ku ta parti di e famia ei. Un pais ku traha di bèrdat riba oportunidat igual pa su siudadanonan ta un pais ku lo progresá. mi ta un muhé luchadó ku un kurason yen di amor pa mi pais i kurashi pa sali pa otro. 19 di mart, yudami yega na e mesa di desishon den parlamento, pa ora desishon keda tuma, tin e muhé aki skerpi, ophetivo i sin miedu ku lo sali pa bo tambe.