WILLEMSTAD – Presidente di Parlamento Charetti America-Francisca a stipulá 23 di mei komo fecha pa sigui ku e reunion públiko ku entre otro e punto ‘Formalisashon di opinion di Parlamento riba e reakshon di gabinete hulandes tokante e rapòrt ‘Ketenen van het verleden’ (kadenanan di pasado).

Durante e reunion di skòrs dia 27 di mart último, Promé Minister interino Charles Cooper a indiká ku gobièrnu mester di 3 siman di tempu pa kontestá tur pregunta ku e Parlamentarionan a hasi.

A trata e tema riba petishon di Presidente America-Francisca mes. El a a pone esaki riba agènda pa tratamentu, a base di artíkulo 64 insiso 1 di Reglamento di Orden di Parlamento. E Presidentea referí na e karta fechá 19 di desèmber aña pasá di Sekretario di Estado di Hulanda i Relashonnan di Reino Alexandra van Huffelen.

Durante e reunion Parlamentario Quincy Girigorie di frakshon di PAR a indiká ku e echo ku Hulanda a ofresé diskulpa pa e pasado di sklabitut, ta un dje promé stapnan den direkshon di rekuperashon i igualdat. E rapòrt menshoná ta e base dje despensa di gobièrnu hulandes na desèmber aña pasá, pa e pasado di sklabitut. Parlamentario Gilbert ‘Gibi’ Doran di frakshon di MFK a lesa e rekomendashonnan den e rapòrt ku ta papia di diskulpa sinsero, reparashon i rekuperashon di honor dje lidernan dje revuelta di katibunan na 1795. Parlamentario Rennox Calmes di frakshon TPK a enfatisá ku no ta hibando e diskushon manera mester ta. Ta hasiendo esaki na e forma robes. E no ta komprondé dikon víktimanan di sklabitut mester bai buska despensa e shonnan, esnan ku a okashoná tur e problema. E no ta mashá na pas ku e manera ku e proseso a kana.

Parlamentario Giselle Mc William di frakshon di MAN a puntra kon lo duna forma na e reparashon. No a hiba e diskushon akí na Kòrsou ainda. E meta di reparashon mester ta eliminá desigualdat. I esaki mester hiba na emansipashon duradero di e pueblo, kaminda ta drecha e fayonan di pasado. Parlamentario Sheldry Osepa di frakshon di PNP tambe a para ketu na e dia riba kua Promé Minister di Hulanda Mark Rutte a pidi despensa pa e pasado di sklabitut. Rutte mes a mustra riba e echo ku e efektonan di e pasado di sklabitut akí, te ainda tin su efektonan. Segun Osepa, awó ku a dal e promé stap i a pidi despensa, mester kuminsá traha riba un Kòrsou den kua igualdat ta pará sentral i kaminda no tin deskriminashon ni rasismo.

Minister Cooper a pidi Parlamento tempu pa duna gobièrnu e espasio nesesario pa tur analisá i kontestá tur pregunta hasí. Promé ku a skòrs e reunion biaha pasá, frakshon di MAN a entregá un proposishon di moshon pa bin ku un komishon nashonal enkargá ku e tarea pa duna rekomendashonnan tokante kon mester atendé ku e tema reparashon. E lider dje partido Mc William ta spera ku ora pone e moshon pa votashon, ku Parlamento lo aprobá esaki.