Implementashon di normanan legal riba tereno di salu públiko, mester ta supervisá pa ekspertonan den e arena medisinal.

Willemstad, — Ta urgí minister di Salubridat, Medio Ambiente i Naturalesa pa hasi tur loke ta na su alkanse pa tuma akshonnan konkreto pa reinstalá e Konseho di Salú Públiko.

Parlamentario Eduard Braam di frakshon MFK a kompartí ku e Konseho di Salu Públiko a keda instituí for di 2004 pero for di 2012 esaki no tabatin direktiva. Despues di 12 aña ta bini ku e moshon aki pa asina reinstalá e komishon pa Konseho di Salu Públiko. Si ke krea un bon sistema di salubridat mester di e órgano aki. E órgano aki lo yuda alkansá un bon nivel di salu, aksesibilidat di kuido, i tambe kalidat di kuido. E órgano aki tin e responsabilidat pa konsehá minister di salubridat pa hiba un maneho adekuá, segun Eduard Braam ta splika.

Parlamentario Giselle Mc William di frakshon MAN a kompartí ku e Konseho ta sumamente importante pa lokual ta trata e Landspakket. Giselle Mc William tambe a komparti lokual Gibi Doran di frakshon MFK a menshoná tokante di personanan aktualmente ku ta konsehá minister di salubridat mas riba sifra. Pues segun Mc William e Konseho di Sali Públiko aki lo mester trese mas perspektiva tokante di salu públiko.

Ta asina ku aktualmente Kòrsou no tin un Konseho di Salu Públiko. Si Kòrsou konosé un Konseho pa Grandinan ku ta konsehá gobièrnu pa lokual ta trata kuido di hende grandi. Anteriormente minister Silvania a kompartí ku proseso pa yega na un konseho a keda enkaminá kaminda mester adaptá e lei eksistente dor di kambio di e struktura estatal, kaminda e landsverordening ‘Raad van Volksgezondheid’ mester a wòrdu adaptá i publiká di nobo.

Dor di e kambio di e struktura estatal, e landsverordening i eilandsverodening a keda eliminá, e eilandsverordening a pèrdè su base i no por a wòrdu uzá mas. Minister a indiká anteriormente den sala di parlamento ku a start un proseso di adaptashon pa yega na un landsverordening pa Kòrsou ku ta funshoná i un konsepto adaptá a bai Staten. Ainda e konsepto nobo no a keda publiká esaki mester sosodé ainda i despues lo por kana e proseso kaminda ta yega na un Konseho pa salubridat públiko.