Nieuwe Haven—Awe, 25 di Òktober 2023 a yega e fecha unda Korte a súplika pa entregá un balotashon riba Mullet Bay, den e disputa di Ennia Caribe Holding kontra di Grupo Ansary. Pero e fecha ultimatum ta keda kanselá, pasobra djabièrnè último Ennia Caribe Holding a entrega un petishon ku por alargá e proseso den korte.

Abogadonan di Ennia Caribe Holding den un karta di djabièrnè último, a hasi un petishon na Korte di Apelashon pa posponé un desishon i pasa e kaso pa un evaluashon na un Tribunal Supremo. Esaki ta un proseso ku lo tuma por lo ménos 12 pa 18 luna di tempu, sino tam as. Esei pasobra e Tribunal Supremo, ta un tribunal ku ta tuma su tempu pa pasa den e kasonan i duna un rekomendashon. E rekomendashon ta duna klaridat riba hurisprudensha, nifikando un aprobashon of rechaso di e tratamentunan den Korte di Apelashon.

E retraso amplio, ta lanta e diskushon si Ennia Caribe Holding, tabatin purá pa finalisá e kaso I yega na un solushon riba e solbabilidat di e kompania, mirando e karakter agudo ku abogadonan a trese dilanti den korte. Den un komunikado emití e siman aki Ennia a menshoná na su klientenan pa keda trankil. Segun e komunikado, 5 di òktober último, gobièrnu di Kòrsou a rechasá finansiamentu for di Hulanda. Gobièrnu a disidí di pone e rekursonan nesesario disponibel pa paga e penshun di e tenedó di pòlisa di ENNIA Caribe Leven NV (ECL) den kaso ku rekursonan propio no ta sufisiente. Simannan benidero, ENNIA, Banko Sentral di Kòrsou i Sint Maarten i gobièrnunan di Kòrsou i Sint Maarten lo enfoká riba posibel alternativa pa restrukturashon di Grupo ENNIA.

Pa e kliente segun Ennia, nada no ta kambia. Por kontinuá normalmente ku seguronan eksistente i  por sigui sera pólisanan nobo. Esaki ta konta pa ENNIA Caribe Leven NV, ENNIA Caribe Schade NV i pa ENNIA Caribe Zorg NV.  ENNIA su operashon ta sigui normal i ta kla pa sigui atendé kliente- i partnernan ku e mésun bon servisio ku ta brinda pa 75 aña kaba. Segun e kompania, ENNIA semper a kumpli ku tur obligashon di pago i lo sigui hasi esaki.

Pero e informashon di Ennia no ta korekto. Na momento gobièrnu kuminsá ku “afbouwen” den e kategoria di penshun, kombiná ku un “run off” i limitashon di kliente nobo, e kompania di seguro mas grandi na Kòrsou mester kuminsá baha empleado. Esaki na su turno ta nifiká problema sosial pa esnan empleá na Ennia. E sup efekto ku tambe tai tuma lugá ta un “run off” di empleadonan kapasitá pa otro kompania, esta retironan boluntario.  Banko Sentral i Gobièrnu ta asumí ku Ennia Daño i Ennia Kuido lo sigui bende pólisa. Esei lo no ta probabel. Seguro ta keda seguro, i si no tin siguransa no tin negoshi den e industria. Hopi kliente lo bandoná nan loyaldat na e kompania i buska otro kompania di seguro. No por konkluí nada otro sino ku “afwikkeling” lo resultá den eutanasia di Ennia Caribe Holding. Pero, e “zet” ku abogadonan na Ennia a hasi siman pasá ta alargá e proseso mas largu, lantando e pregunta si en bèrdat Ennia Caribe Holding tin “purá” pa solushoná e problema si solbabilidat.