Suzy Römer.

Punda– PIN ta kontentu ku e selekshon di e kompania, Curacao Oil Refinery Complex B.V., CORC,  den kua tin partisipashon lokal, komo partner preferí pa RDK negoshá kuné riba eksplotashon di e fasilidatnan petrolero di Kòrsou.

E logro aki, ta nifiká e posibilidat pa rebibá i renobá un sektor ekonómiko importante di nos ekonomia ku banda di e kuponan di trabou direkto, ta generá míles di kupo di trabou den e parti di ekonomia ku ta mará na e sektor di rafinahe di krudo (zeta). PIN ta sumamente kontentu ku promé ku eks Minister di Medioambiente, Suzy Römer,  a baha komo Minister e la formulá un kuadro ku reglanan aplikabel pa mantené un bon medioambiente basá riba normanan di Union Oropeo. Ademas sra. Römer a laga un lei den proseso ku ta ankra e reglanan moderno di medioambiente den nos sistema. Nos ta sali for di punto di bista ku e kuadro di medioambiente lo ta e base pa deliniá e trayekto ku lo mester kana pa yega na modernisashon di rafinahe di krudo na Kòrsou segun normanan di medioambiente internashonalmente akseptá.

Na gobièrnu nos ta dirigí dos pregunta. Na promé lugá, kon leu ta ku e lei di medioambiente ku PIN a laga den preparashon? Na di dos lugá pa klousura a keda e pregunta, si ta bai negoshá ku un kompania so, òf mas kompania. Paso for di eksperensia ku Klesch nos por a konkluí ku negoshá ku un kompania so no ta e mihó strategia di negoshashon, ya ku e kompania por asumí un posishon komo si fuera nos ta dependiente di dje.