Willemstad—–Eksaktamente sesenta aña pasá, dos sambuyadó di Marina mester a  sambuyá saka un arma ‘lihé lihé’ den haf den serkania di Marinebasis Parera. Sinembargo nan niun di dos a bin bèk na superfisie ku bida. Na e Santana Militar na Roodeweg na  Willemstad, djarason ku ta tras di lomba, Defensie Duikgroep (DDG) a rekordá e aksidente trágiko aki, poniendo un krans i a duna un spich.

Tabata e Ofisial di Intendensia i bushi Herman Burger i Gerrit ten Donkelaar di apénas diesocho aña di edat, ku tabata matros, kòki i  sambuyadó asistente, ku dia 30 di aprel 1963, a pèrdè nan bida durante nan labor.

“Kada di tres djaweps den luna di Novèmber, DDG na Den Helder ta rekordá nan i tres otro sambuyadó di Marina, ku desde 1963 a pèrdè nan bida durante nan labor”, asina Sander Kool, Komandante di DDG ta bisa. “Awor ku nos ta riba e isla pa ehersisionan di buseo, ta presisamente sesenta aña ku Herman i Gerrit a fayesé, i nan ta e úniko entre e sinku nan, derá aki  na Kòrsou, i nos lo ke menshoná nan nòmber.”

Un aksidente trágiko

Riba Aña di La Reina, 30 di aprel 1963, habitantenan den Region Karibe Hulandes ta prepará nan mes pa oubade di muchanan di skol i pa e parada Militar tresé pa trupanan di e Komando di Forsanan Naval na Antia Hulandes.

E tripulashon di Hr.Ms. Rotterdam ta kasi yegando fin di nan trayektoria na Antia Hulandes.  Komo último seremonia di nan estadia, un parti di e tripulashon ta partisipá ainda na un parada, pasa den sentro di Willemstad. Ora ku na un dado momentu di deskuido un arma ta kai den laman, e Ofisial di Intendensia  i e sambuyadó asistente mester saka esaki ku rapides for di laman bini ariba ku n’e. Pero e akshon di búskeda ei a terminá den un tragedia. A lubidá di stòp e pòmp ku ta hala awa aden.

Dor di e forsa ku tabatin den e tubu di atmishon di awa, esaki a chupa Gerrit hal’é bai ku n’e den e roster. Probablemente Herman tabata kier a yuda Gerrit i esei a resultá fatal.

“Komo rekordatorio di e importansha di seguridat na e lugá di labor, ta importante pa tene un konmemorashon”, sigun Komandante Kool. “Komo konsientisashon. Komo rèspèt pa e aporte i e gran sakrifisio ku nan a hasi, i komo rèspèt den direkshon di famianan sobrebibiente.”