WILLEMSTAD – Por konsiderá e proyekto di supervishon di kámara komo destrukshon di kapital, debí na desaroyo kontínuo di teknologia i e posibilidat ku e kámaranan ku ainda no ta instalá por bira muchu bieu, sin ku no a ni usa nan ainda.

Asina Kontraloria General di Kòrsou (Algemene Rekenkamer Curaçao: ARC) a kontestá Parlamento riba preguntanan hasí riba 27 di sèptèmber último tokante e proyekto. Durante e reunion ei ARC a presentá su rapòrt ku resultadonan di nan investigashon. A invertí 21.6 mion florin den e proyekto, pa kua Minister di Hustisia (di turno) ta responsabel p’e.

Segun Zita Jesus-Leito di PAR i Juniël Carolina di MFK, Kontraloria no a pone atenshon den e presentashon si tabatin destaho públiko. Segun ARC: “Artíkulo 10 di e Landsverordening financieel beheer (ordenansa nashonal di maneho finansiero), ta bisa ku mester tin destaho públiko pa e sumanan usá i bou di kua sirkunstanan por hasi otro.” Kontraloria ta mustra unda den su rapòrt nan ta presentá e grado ku a hasi uso di destaho públiko durante e proyekto akí. A kumpra kámara serka e kompania chines Inspur i pa falta di finansa no a instalá nan. “Tambe tin kámara riba outo di polis ku nunka a usa. Por konsiderá tur esaki komo destrukshon di kapital.” Asina ARC a kontestá riba pregunta di Gwendell Mercelina di PNP. Riba e pregunta si ARC ta di opinion ku mester bin ku un enkuesta parlamentario: “Ta prerogativa di Parlamento pa disidí si esei ta nesesario i Parlamento por hasi uso di e rapòrt di Kontraloria pa disidí esei.” Gobièrnu a sera dos kontrakt ku e kompania chines Inspur.

Aparte di kámaranan, Inspur mester a duna tambe entre otro, servisio di instalashon. “Minister di Hustisia por duna mas informashon tokante e kontrakt. Riba e pregunta di Gilbert Doran di MFK kon bin e proyekto a bai asina robes, Kontraloria ta kontestá: “E proyekto no tabata bon prepará i no tabata kla kuantu sèn, hende, material ètsetera lo tin mester. E rekisitonan formal i legal no tabata kla i ta tuma hopi tempu pa drenta na vigor. E koordinashon i supervishon durante e implementashon di e proyekto no tabata reglá delantá.” Sheldry Osepa di mesun frakshon a puntra unda e 200 i piku kámaranan ku no a instalá ta wardá. Segun ARC a warda nan den dos depósito den un lugá ku tin vigilansia. “Debí na meneho defisiente di depósito (entre otro, almasenamentu negligente), Kontraloria no por a konstatá si di bèrdat tur kámara no instalá, tabata den e dos depósitonan.” Osepa tabata ke sa tambe kuantu dje kámaranan instalá ta funshoná ainda.

“Na yüni 2022 esei tabata 187. Kontraloria no a konstatá kuantu di e kámaranan ta funshoná ainda t eku e luna di òktober 2023, ni kuantu kámara a bin aserka. Minister di Hustisia por duna kontesta riba esei.” ARC no por a kontest’é kiko ta bai pas aku fase 3 i 4 tampoko: ta Minister di Hustisia sa. “Den sèptèmber 2023 Minister di Hustisia a duna deklarashon den prensa ku ta sigui pone kámara di seguridat, pero ku enfoke tambe riba barionan.” Doran a puntra tambe den kua área di Kòrsou a pone e kámaranan. “E kámaranan ta instalá den áreanan turístiko, aeropuerto, prizòn i vianan ku ta hopi usá.

Riba su pregunta si e kámaranan na Helmin Magno Wiels Boulevard ta funshoná, ARC a kontestá Osepa: “E dos kámaranan Helmin Magno Wiels ta kámaranan di tráfiko ku ta konektá riba e ret. E imágennan ta drenta na e sala di monitorio. Esaki ta nifiká ku nan ta funshonando. Ounke nan ta funshoná, no por usa nan pa e propósito fihá, pa traha prosèsverbal i but pa e infrakshonnan di tráfiko konstatá. Ku otro palabra, téknikamente nan ta funshoná, pero no pa e meta ku a pone nan den operashon p’e.” ARC no por bisa riba pregunta di Doran ki garantia tin ku e otro kámaranan ku lo bai instalá, ta bai funshoná i lo trese solushon. “Minister di Hustisia lo por kontestá e preguntanan akí.”

Meskos ARC ta bisa riba e pregunta kiko ta bai pasa awó. Steven Croes di PAR a mira den rapòrt e sumanan total pa aña i tabata ke sa si Kontraloria a hasi un kalkulashon kiko ta e montante pa kada kámara ku a kumpra. ARC: “Kontraloria no a kalkulá e montante pa kada kámara i e montantenan duná no ta solamente pa kámara, pero pa tur ekipo i instalashon ku ta forma parti di e proyekto. Den esei ta entre otro dos monitorin/ strongroom, palu pa buta e kámara riba dje, kabelnan, internèt, konsultanan for di China i kompanianna lokal pa instalashon, ètsetera.”