Parlamentario Frenciss Lourens di frakshon MFK a entregá moshon den kual ta urgí gobièrnu pa huntu ku Selikor bini ku inisiativanan nobo pa generá sèn, desaroyá maneho di resiklahe, i pa introdusí sistema di statiegeld.

Willemstad, — Un moshon a keda aprobá djabièrnè dia 26 di yanüari último,  por medio di votonan general, den kual ta urgí gobièrnu pa huntu ku Selikor bini ku inisiativanan nobo pa generá mas sèn, desaroyá maneho di resiklahe, i pa introdusí sistema di statiegeld.

Parlamentario Frenciss Lourens di frakshon MFK a kompartí ku resiklahe ta algu konosí kasi tur kaminda na mundu. Na Kòrsou tin posibilidat pa saka ganashi i energia for di resiklahe, pero lástimamente nos no ta hasi uzo di esaki. E parlamentario a indiká ku Kòrsou ta hopi sushi i ku ta benta sushi bou di tera na landfill pero no por sigui mas asin’aki. Ku resiklahe ta kontribuí na medio ambiente i tambe yuda fortalesé Selikor, i krea kuponan di trabou, segun e parlamentario ta splika.

Fergino Brownbill di frakshon MFK a kompartí ku tin akshonnan den kual ta limpia barionan, pero ku esaki no ta sufisiente pasombra mester bini konsientisashon. No ta asina ku tin ku kue e kùp ku a keda tirá abou na suela dor di un otro persona sin trese un inisiativa finansiero. E statiegeld ta promové i motivá e komunidat pa mas lihé ku ta posibel trese  kambionan pa tene Kòrsou limpi. Fergino Brownbill a kompartí ku e ta felisitá e parlamentario Frenciss Lourens pa a entregá e moshon aki.

Gwendell Mercelina di frakshon PNP a kompartí ku mester pone énfasis riba maneho di sushi entre otro resiklahe. E parlamentario a kompartí ku den Staten e mes ta un di e personanan ku ta motivá pa separá sushi na Staten. Otro parlamentarionan tambe a kompartí di nan banda kon kontentu nan ta ku e moshon aki a pasa, entre otro Ana-Maria Pauletta di frakshon PAR ku tambe ta un di e parlamentarionan ku ta duna ehèmpel pa tene Kòrsou limpi. Ana-Maria a kompartí ku ta sostené e moshon aki ya komo esaki ta sostené pais.

Giselle Mc William di frakshon di MAN tambe a indiká di su parti ku ta sostené e moshon aki ya komo esaki ta promové un ekonomia sirkular aki na Kòrsou. Ya komo ta konosí kaba Selikor por medio di e proyekto RESEMBID ta enfokando riba un estudio di karakterisashon di sushi.  E moshon aki ta promové  maneho di sushi sostenibel aki na Kòrsou i esaki ta trese mas progresividat pa lokual ta trata maneho di sushi.