Ta importante pa atendé ku kuminda i alimento di un manera seif pa asina por brinda un mió servisio na personanan lokal i turista.

WILLEMSTAD, — Sharina Clementina direktora di Services HACCP di Safety Curaçao (SHSC) ta menshoná ku tin falta di konosementu di higiena den HORECA.

Sharina Clementina direktora di SHSC a duna reakshon riba e kasonan últimamente di restorantnan ku a bai será debí na situashon a-higiéniko. Sharina Clementina ta menshoná ku e parti di konosementu ta laga di deseá den e parti di higiena den restorant. E parti di konosementu ku GGD ta duna ta hopi importante, pero komo un kompania privá, SHSC ta mira ku por aportá na e parti di konosementu ku ta bai hopi mas profundo di lokual GGD ta brinda.

Sharina Clementina ta menshoná ku e training di SHSC ta kasi mesun kos ku di GGD, pero ke kana banda di gobièrnu pa asina yuda ke parti di konsientisashon i tambe kontròl. Esaki ta importante segun Sharina Clementina paso GGD no tin e kapasidat di personal sufisiente pa hasi konsientisashon i kontròl 24/7. SHSC ta un kompania privá ku tambe ta duna konosementu, training i ta hasi inspekshon den kushin di un restorant.

Sharina Clementina ta menshoná ku den kaso di SHSC, e organisashon ta bai un kompania manera entre otro restorant, ta papia ku nan, i ta sera un areglo den kual SHSC ta yuda ke parti di inspekshon dor di hasi bishitanan algun biaha pa aña. E training ku SHSC ta duna ta bai mas den detaye kompará ku GGD pasombra ta yuda e organisashonnan hasi inspekshon i traha rapòrt riba e parti di inspekshon pa yuda nan wak kiko mester drecha i kiko mester kambia.

Sharina Clementina ta sigui menshoná ku tantu bal ta pasa na restorant i ta dal nan sera si no ta traha riba e parti di konosementu. Clementina ta menshoná ku seguridat di alimento i bebida ta hopi importante pa públiko, pero e restorantnan tambe ta pèrdè ganashi den e dianan ku e ta keda será.  Si restorantnan tin intenshon i ke kumpli ku regla mester yuda nan pa asina nan por hasi esaki na un forma korekto.

Clementina ta pensa ku e parti di konsientisashon mester kuminsá na gobièrnu. SHSC ya kaba ta traha riba parti di konosementu i ta kapasitá pa duna mas training na e kompanianan manera restorant riba e parti di higiena i kuminda.  Sharina Clementina ta menshoná ku por bini un mihó kolaborashon entre GGD ku e kompania privá SHSC, i ku na e momentunan aki ta sinta na mesa huntu ku Ministerio di GMN pa asina yega na un akuerdo tokante kon SHSC por yuda ke parti di konosementu.

Mas aleu Clementina ta menshoná ku SHSC ta traha kaba ku sierto restorantnan i tambe ku un tim pa asina yuda e restorantnan pa kumpli ku reglanan di alimento i higiena. Ta yuda restorantnan traha riba e parti di inspekshon kual ta wòrdu dokumentá den un rapòrt ku e kompania ta mandá na SHSC. SHSC ta manda e rapòrt bèk i ta dirigí e restorant riba loke nan mester drecha. Pero tambe SHSC ta yuda por medio di ‘klusjesmannen’ pa asina por yuda drecha sierto kos den kushina di restorant pa asina por kumpli mas mihó ku reglanan di seguridat di higiena i kuminda.

Na e momentunan aki SHSC  ta kolaborá ku Koninklijke Horeca Nederland (KHN) sekshon Kòrsou, pa mehorá e servisio i kalidat di higiena i kuminda i seguridat den sektor di HORECA, dor di hiba esaki na un nivel internashonal (HACCP). Tantu minister Van Heydoorn di OWSC komo minister Cijntje di Desaroyo Ekonómiko, a indiká ku turismo ta un di e pilarnan ekonómiko mas importante di Kòrsou i ku e entrenamentu HACCP ta yuda mehorá e nivel di servisio i eksperensia ku nos ta ofresé na nos turista i hende lokal. Sharina Clementina ta menshoná ku  hopi hende mester di guia pa asina por kumpli ku reglanan. E kurso di HACCP ta duna informashon tokante di seguridat di kuminda; diseño, konstrukshon i uzo di área di kuminda i apèrturanan; limpiesa i desinfekshon; trato di sushi; higiena personal; peliger di kontaminashon i kontròl di esaki; kontròl, verifikashon, i registrashon di temperatura. Den e kurso di HACCP tantu individualnan komo organisashonnan ta siña tokante kon pa atendé ku siguridat di alimento i higiena.