Minister Pisas splikando ku a tarda e reunion sin mester. Cooper a hasi meskos.

WILLEMSTAD – Miembronan di Parlamento lo bolbe bini huntu dia 23 di novèmber den un reunion públiko pa deliberá ku Minister Presidente Gilmar “Pik” Pisas i Minister di Finansa Javier Silvania òf su remplasante Charles Cooper tokante e situashon na kompania di seguro Ennia.

Na kuminsamentu di e reunion ku a skòrs dia 16 di òktober último, Parlamento a bai di akuerdo ku un punto di òrdu di Parlamentario i lider di partido KEM Michelangelo “Lo” Martines pa duna miembronan di Parlamento e oportunidat pa pasa den e dokumentonan (inzage) relashoná ku Ennia. Martines a haña importante pa tuma nota di tur korespondensia entre gabinete Pisas 2 i Banko Sentral di Kòrsou i St. Maarten (CBCS) i Sekretario di Estado pa Relashonnan di Reino Alexandra van Huffelen. Parlamento a bai di akuerdo. Martines tabata ke hasi esaki promé ku e debate, pasó no tabatin nada pa debatí ariba.

Parlamentario i lider di MAN Giselle Mc William a sostené e pensamentu di Martines mustrando ku e esensia di e reunion tabata falta di informashon dokumentá, ‘zwart op wit’ (pretu riba blanku) i no loke gobièrnu ta simplemente bisa ku a pasa. E tabata ke wak e asina yamá ‘hoofdlijnenakkoord’ ku gabinete Pisas 2 mes a bari for di mesa na kuminsamentu dje luna akí. El a mustra riba e echo ku e intenshon no mester ta hiba un diskushon polítiko tokante Ennia, sino unu ku kontenido pa ku solushon di e problema akí, basá riba dokumentashon.

Parlamentario Ana Maria Pauletta di PAR tambe a segundá Martines i Mc William i a agregá algun dokumento mas, mirando e ‘falta di transparensia’. El a pidi e último kuenta anual di Ennia, pasó si ta papia di posishon finansiero i di likides di Ennia, e mes ke pasa den e sifranan. Tambe e tabata ke prueba di loke gobièrnu a akusá Van Huffelen di dje, manera aktitut deskriminatorio ‘payback’ ètsetera. Manera semper frakshon di koalishon di MFK, spesífikamente Amerigo Thodé tabatin problema ku e petishon i a tuma su tempu pa ampliamente keha tokante e posishon ku oposishon a tuma. El a hasi manera no por pidi dokumento durante un reunion.

Parlamentario i lider di PAR Quincy Girigorie a koregí Thodé mesora, rekordand’e e reglanan ku Parlamentarionan por pidi dokumentashon durante reunion. Girigorie ku poko palabra a yama Thodé hipókrita di pidi pa agregá su karta amplio tokante Ennia na momentu ku e reunion a habri, pa despues bira akusá esnan ku ta pidi informashon tokante e punto ku nan a pidi dokumentashon. Segun Girigorie, a pidi e reunion pero un karta di Minister Presidente a yega Parlamento indikando di no ta interesá pa bai Parlamento. I komo ku a konvoká e reunion despues tòg, Parlamento tin tur derecho pa pidi dokumento.

Pisas a splika ku no ta sin mas a tuma e desishon ei. Debí ku nan tabata den deliberashon ku Hulanda, lo tabata práktikamente pa pòrnada e lo a presentá den Parlamento. “Mi a duna Parlamento rèspèt di informá esaki i a interpret’é robes. Por a agregá un adèndùm i pidimi e dokumentonan. Tur e tempu ku a tuma akí (pa diskutí, redakshon) lo por a dediká na otro punto. Pidimi delantá no?! Di tur aña ku mi tabata den Parlamento, esaki ta un novum. A zundra ku mi no a bin. Awó ku mi tei, ta pèrdè tempu.” Pero segun Girigorie el a lubidá algu masha importante. A pidi e reunion dia 13 i dia 17 el a bisa e no ta bai Parlamento. “Si e no ta bin, kon mi ta bai pidi dokumento. Dia 10 di òktober ta bisa Parlamento ‘nos ta bin’. Kua tempu tin pa pidi dokumento e or’ei? Papiando di novum, den e reunion di CPR a trata kantidat di tema. A pidi dokumento, Minister Presidente a bai buska dokumento, miéntras ku disertashon tabata andando. Loke ta pasando awe (dia 16 di òktober) ta masha nòrmal.”

Pauletta komo èks presidente a haña e reakshon di Pisas i Cooper un bèrguensa. “Un èks miembro ku tin hopi mas tantu aña ku mi den e sala akí, ta pretendé di bisa di lo tin ku bai buska oranan largu pa haña dokumento ku bo ta ‘supposed’ di ta soña nan. Mester buska oranan pa sa likides di Ennia, siendo 1’or mester papia ku Van Huffelen? Bo ke bisami awe un ‘managementreport’ ku bo mstr a lesa 10 biaha pa studia pa por negoshá, ta durabu oranan largu pa haña? Mi no ta fèrwagt Minister Presidente tin nan den su maleta. Pero esnan ku a negoshá na nòmber di Kòrsou sí lo mstr tin nan na man. Fo’i na momentu ku e sala akí a pidi e reunion, mester a sali fo’i e punto di bista ku Parlamento lo a pidi tur e dokumento. Spesialmente di un èks miembro ku konstantemente tabata pidi dokumento. Komo èks presidente di Parlamento mi sa. Laga nos laga e ridikules akí para.”

Despues ku Presidente di Parlamento Charetti America-Francisca, a skòrs e reunion pa algun ora pa miembronan por tuma nota di vários dokumento ku gobièrnu a pone na disposishon di Parlamento, e Parlamentarionan a haña e oportunidat di hasi pregunta den e promé tanda. Gobièrnu a pidi tempu pa prepará, pa kontestá na otro okashon. Entretantu e Presidente a disidí pues ku esaki tin ku tuma lugá otro luna.