WILLEMSTAD, — Promé Minister di Hulanda Mark Rutte a para ketu tambe na futuro di Reino despues di e despensa ku su gabinete a pidi pa e ròl ku e pais a hunga den historia di sklabitut transatlántiko. Segun e premier e despensa ta marka e inisio dje proseso ku mester sigui den e aña konmemorativo 2023. E ke pa Reino traha alabes riba un futuro kompartí awor.

E debate públiko tokante e pasado kompartí di sklabitut den Reino i e impakto di e pasado aki tabata konsentrá resientemente prinsipalmente riba e diskulpanan di gobièrnu hulandes. Rutte: “Tin desaroyonan importante den e pensamentu pa loke ta trata nos pasado; na mes momentu tambe tin un diskushon sosial tokante e forma i e nesesidat di e diskulpanan. E diskulpanan di 19 di desèmber ta un promé paso importante. Na mes momentu nan ta marka e inisio di un proseso ku mester sigui den e aña konmemorativo. Den e aña ei, nos lo reflekshoná huntu riba e konmemorashon di dia 1 di yüli 2023, i huntu nos lo duna forma na e Komishon di Konmemorashon i tambe e fondo. E ophetivo final ta sigui pone mas atenshon na e pasado kompartí, pero riba tur kos traha huntu riba un futuro kompartí.” Rutte a enfatisá ayera ku nos historia kompartí konosé partinan ku – bibando den siglo 21 – ta yena nos ku horor i laga nos turdí. “Nos lo no por kita e historia ei ku diskulpanan, i esei no ta e mínimo ophetivo di e gobièrnu akí tampoko. Nos no por kambia historia, pero nos por enfrent’é. Manera indiká, nos ta mira e presentashon di e reakshon di gobièrnu komo un paso importante i no komo un piesa final. Tambe nos ta mira ku e proseso di konsientisá tokante e pasado di sklabitut ta hopi leu fo’i kla. Despues di e reakshon di gabinete nos ke traha huntu ku esnan imbolukrá riba un futuro kompartí, i tambe den e mesun direkshon despues dje start di e aña konmemorativo di sklabitut di pasado dia 1 di yüli 2023. Loke gobièrnu ta spera ta ku e reakshon akí ta yuda nos na e momentunan akí, den henter Reino i huntu ku Sürnam i otro paisnan, pa yena e páginanan habrí ku nos tin dilanti nos, ku diálogo, rekonosementu i sanashon.”