Back to Top
Responsive image
E korant di pueblo

Segun partido PIN no tin espasio pa polítika di bulpes


August 24, 2021 • 3 minüt pa lesa

Willemstad — Despues di a basilá basta ratu, gobièrnu Pisas sikiera a duna un tiki oido na e gritu di CMC i a perkurá pa e hospital haña algu di fondo èkstra. PIN a ferwagt ku parlamentu lo a sigui den e direkshon ei konsiderando ku COVID ta un krísis inesperá ku rònt mundu ta hasi èkstra sosten di gobièrnu pa hòspitalnan sentral nesesario, ya ku niun no ta trahá pa krísisnan grandi manera Covid-19.

Kualke polítiko responsabel lo a duna balor na e alarma ku profeshonalnan di kuido intensivo i nan direktor a bati, Dikon? Paso e alarma aki ta duna oportunidat pa prevení mortonan innesesario. P’esei Partido PIN ta asombrá ku gobièrnu, pero espesialmente e mayoria den parlamentu, a skohé pa kontesta CMC ku un moshon engañoso ku ta pidi pa investigá e struktura hurídiko di CMC. Dikon e moshon ta mentiroso? Pasobra e koalishon liderá pa MFK mester por sa ku na aprel 2017 Gabinete Pisas mes a tuma e desishon riba e struktura hurídiko pa CMC i hasta a pidi pa implementá e struktura inmediatamente. Kua struktura? E struktura di un Holding HNO ku bou di dje HNO Exploitatiemaatschappij (CMC) pa servisio di hospital i e HNO Vastgoed pa kuida e edifisio. Ademas por lo ménos 2 di e firmantenan di e moshon tabata miembro di parlamento na aprel 2017.

Akaso e set pa venga ta pone parlamentarionan lubidá kiko nan mes partidonan i gobièrnunan a hasi? Pasobra ademas ku Gabinete Pisas a duna òrdu pa aselerá implementashon di e struktura hurídiko, na aña 2013 kabinete Asjes, e tempu ei ku sosten di PNP, a será un MOU pa bin ku e entidat HNO-Exploitatiemaatschappij i HNO-Vastgoed ku awe nos ta papia di dje. Kiermen tur dos partido a aprobá e struktura!
Den mesun moshon a pidi pa no duna CMC niun sèn pretu mas promé ku nan agotá un supuesto reserva di 5 mion florin. Partido PIN ta puntra: e parlamentarionan di MFK i e sobránan ku a sostené e moshon aki sa e diferensha entre un “overdraft facility”, un “reserva” òf “kuenta koriente”? Unda e parlamentarionan a haña e informashon ku ta trata di un reserva? Ta informashon verifiká serka CMC i su akountentnan? Nan sa ku hustamente COVID tin CMC den problema finansiero i ku pa kolmo e supuesto reserva di 5 mion florin no ta eksistí? Òf ta e ministernan a malinformá parlamentu? Nan ta konsiente ku ta manda nan ta manda CMC hinka su kurpa den ainda mas debe pa atendé ku konsekuensianan di un pandemia mortal? Nan sa ku gobièrnu Ulandes si a i ta yuda paga e personal èkstra pa CMC? Tur e pregunta nan aki ta pone PIN pensa ku e moshon di djaweps último ta simplemente un ekspreshon di vengansa kontra CMC i su hendenan, djis pasó direktor di CMC i e profeshonalnan di Intesive Care a bati bèl despues di a plantia e problema basta dia promé sin ku gabinete Pisas a tuma desishon pa yuda ku algu pa e hòspital por drai.

Un parlamentu ku bèrdat ke praktiká dualismo responsabel, esta ku ke kontrolá e gobièrnu di bèrdat, lo no a bai solamente tras di loke ministernan bis’é, pero lo a buska su propio informashon serka CMC i otro aktornan relevante. Es mas, si di bèrdat e frakshon di MFK i PNP i e otronan ku a firma e moshon ta konvensí ku CMC tin un reserva i ku e mester uz’é promé, ta dikon a asepta ku gobièrnu a buska i haña 2 mion riba presupuesto i hasta a pidi Hulanda pa siguí yuda paga personal pa CMC? E ta opvio ku algun frakshon den parlamentu, ku esun di MFK na kabes, a usa un moshon pa hala CMC, su direktor i profeshonalnan di Intensive Care na sot’i bulpes. E aserkamentu aki no ta resultá den nada benefisioso. E ta mustra si ku e parlamento no tin ku nes ku e empleadonan di kuido intensivo i otronan ku durante henter e krísis aki inkansablemente ta duna nan máksimo pa kuida esnan ku ta sufri di Covid òf kualke otro malesa.

Partido PIN su posishon ta ku si e prekupashon ku CMC ta real, e or’ei parlamento awor si mester ehekutá e moshon ku a pidi un enkuesta parlamentario pa pone lus riba tur aktor i desishon tumá rondo di
CMC enkuanto finansiamentu, struktura hurídiko, sitio di konstrukshon, konstruktor i supervisor di konstrukshon. •

Login