Sertifikado di HACCP ta hisa nivel di konosementu di nos hendenan riba e merkado laboral.

WILLEMSTAD,– Sharina Clementina direktora di Services HACCP di Safety Curaçao (SHSC) ta menshoná e importansia di konosementu di siguridat di alimento i higiena.

E sertifikado HACCP ta duna personanan i organisashon nan e konosementu tokante kon pa atendé ku siguridat di alimento i higiena. E sertifikado ta un sertifikado bálido ku ta rekonosé dor di Ministerio di Eseñansa, Siensia, Kultura i Deporte di Kòrsou (OWCS). Segun direktora Clementina ta importante di tin informashon di kon ta trata ku kuminda i bebida den forma korekto. Por ehèmpel, si hasi kompra ta kon largu esaki por keda afó? Den un kaso asina no por lubidá e temperatura di e produkto. Den e kurso di HACCP tantu individualnan komo organisashonnan ta siña tokante kon pa atendé ku esaki.

E konosementu di e kurso i sertifikado di HACCP ta hisa nivel di  personanan den nos komunidat ku ta bende alimento. Direktora Clementina di SHSC ke mira mas konsientisashon den e pueblo i ke hisa nivel di konosementu bou di nos hendenan. E koperashon entre SHSC i OWCS ta sumamente importante pa asina por trese mas struktura den nivel di edukashon i konsientisashon di nos hendenan. Por medio di e sertifikado aki individualnan ta duna mas kalidat na nan servisio i produktonan. Tambe individualnan por diferensiá nan mes riba e merkado laboral di Kòrsou por medio di e sertifikado aki. Ta spera ku mas hende lo eduká nan mes riba e tópiko di alimento i higiena.

E siguiente kurso lo tuma lugá dia 25 i 26 di sèptèmber di aña 2023.