DEN HELDER—FIOD i OM den koperashon ku Europol a desmantelá un servisio ilegal di internet-tv.

Kuater persona a keda detené na Almere i Den Helder, mientras a tene entrada den nan bibienda. E servisio tabata ofrese via un datacenter na Den Helder servisio na mas ku un mion hende den henter Oropa. Via internet nan tabatin akseso na 10.000 kanal di televishon i servisio streaming manera Disney, Netflix, Viaplay i Videoland. Ku un kashi i un abono di 10 euro pa luna nan tabata haña akseso. Nan tabata paga e abono kesh via tiendanan. E sentro di data a keda investigá i saka for di aire. Tambe polis a tene entrada den edifisionan komersial den Amsterdam, Den Haag, Almere, Enschede, Hengelo i Den Helder. Outoridatnan a konfiská sumanan kuantioso di plaka kesh ku tabata keda laba, outonan, kuentanan bankario, aparatonan i atministrashon.