WILLEMSTAD – Resientemente riba petishon di Minister di Hustisia Shalten Hato, Ministerio Públiko (OM) representá pa fiskal Guillano Schoop ku dia 1 di febrüari 2024 lo drenta den e funshon di Prokuradó General, a duna un seshon pa refreská e asina yamá “ambtsinstructie” (instrukshon polisial).

E instrukshon polisial ta duna splikashon i instrukshon na ki momento polisnan por uza violensia i nan arma reglamentario. E seshon akí tabata pa miembronan di Landelijke Beveiligingsdienst (LBD) i tur sobrá kolega di e departamento Politiedienst, ku no a logra di partsipá na un di e 5 seshonan anterior. Den futuro lo tin mas seshon tokante e tópiko akí pa e sobrá miembronan di Kuerpo Polisial di Kòrsou, si esaki ta nesesario. Minister di Hustisia mes i tambe hefe di Polidienst Jules Ilario tambe tabata presente durante e seshon.