Kontròl: e gráfiko ta indiká un poko mas mihó kòntròl di Covid pa lokual ta trata e situashon na CMC. E liña mas haltu ta mustra e kantidat di kasonan aktivo (kasi 700). E liña mei mei ta mustra e resultadonan positivo diario (bou di 100). E liña abou ta mustra e kantidat den Kuido Intensivo (kasi nihil).

Otrobanda—Kòrsou ta siguiendo e desaroyo di Covid 19 di aserka e dianan debí na un trènt ku ta
indikando un oumento den kasonan aktivo. Ku kasi 700 persona aktivo ku Covid, e tenshon ta kuminsá oumentá pa wak si ta bai introdusí medidanan.

Apesar ku tin oumento den kasonan aktivo, e sifranan di pashènt hospitalisá i den Kuido Intensivo te ainda ta kedando abou. Pa lokual ta trata Kuido Intensivo, for di inisio di Yüli esaki a keda kasi nihil miéntras esnan hospitalisá pafó di Kuido Intensivo tambe a keda abou sin surpasá e kantidat di 4 persona. Esaki ta pasobra probablemente e proseso di bakunashon ku Kòrsou a pasa aden ta teniendo esnan infektá pafó di portanan di CMC.

Den e dianan aki riba retnan sosial i medionan di komunikashon tin hopi spekulashon riba e ola nobo di Covid. Pero kompará ku Mart Aprel dje aña aki, e sifranan di Yüli tòg a sera un poko alentador pa lokual ta trata e situashon na CMC. Sin bai den detaye dje motibunan ku kisas a kousa un ola nobo, sifranan di Yüli kompará ku Aprel por ta indikativo ku e situashon aktual ta ménos menasante pa CMC. Riba 17 di mart último, tabatin un kantidat di 611 kaso aktivo ku 8 persona den CMC i 3 den Kuido Intensivo. Na Yüli segun e infekshonnan a kuminsá oumentá, levemente te ku 13 di yüli tabatin solamente 4 persona den CMC i 1 a drenta den kuido intensivo. I na momento Kòrsou a yega 610
kaso aktivo riba 22 di yüli último, tabatin 2 persona den CMC miéntras unidatnan di Kuido Intensivo tabata bashí pa Covid. E sifranan aki kompará ku 17 di mart te ainda ta duna un bon indikashon.

Un otro trènt bale la pena menshoná ta e hecho ku na e momentunan aki Kòrsou a kasi yega 700 kaso aktivo pero e kasonan ku resultado positivo diario te ainda ta bou di 100. Na Mart último, momento Covid a kuminsá oumentá, ya kaba na 700 kaso aktivo Kòrsou tabatin riba 140 kaso positivo diario hasiendo ménos di 800 tèst. Te ku ayera, 26 di Yüli na Kòrsou tabatin 651 kaso aktivo, 48 positivo for di 1545 tèst hasí. Tur e resultadonan aki ta indikativo, ku te ainda no tin prekupashon pa lokual ta trata e okupashon den Kuido Intensivo i na CMC en general.