Ebecilio ta preferá pa no sigui gasta rekursonan finansiero ni tempu mas na e komportashon frankamente adolesente di minister Silvania.

WILLEMSTAD – Sikólogo Stephen Ebecilia a buska un abogado i a eksigí di Minister di Salubridat, Medio Ambiente i Naturalesa (GMN) i di Finansa Javier Silvania den un karta fechá 15 di sèptèmber pa e rektifiká e kantidat di mensahenan negativo i falsu ku el a publiká durante 5 dia largu kontra dje.

Silvania a pone e karta un banda sin wòri ku esaki. Entretantu e sikólogo a disidí di legumai e kaso sivil. E no ke gasta ni tempu ni plaka mas na Silvania, ku na su opinion a demostrá un komportashon di adolesente.  Ofisina di abogado Murray a manda tantu e karta ku e eksigensia pa un rektifikashon, komo e desishon nobo di Ebecilio pa legumai e kaso pa prensa publiká. Segun e karta dje abogado, e manera di aktua di e minister pa aparentemente ekspresá su frustrashon personal riba su página personal di Facebook sin ningun motibu bálido, miéntras su deklarashonnan ta leu for di e bèrdat, no ta un komportashon ku ta spera di un minister i porlotantu ta kompletamente indigno di un minister.

“Aparte di e echo ei, e Minister no a ni sikiera mustra kortesia di konfirmá ku el a risibí e karta, te pa e duna Ebecilio un reakshon. Kiko ku por tabata e motibu p’esei; e no a rektifiká. Mirando e gastunan di un prosedura sivil, e tempu ku esaki ta tuma i e esfuerso ku mester hinka den un prosedura asina, Ebecilio ta preferá pa no sigui gasta rekursonan finansiero ni tempu mas na e komportashon frankamente adolesente di Minister Silvania. Sinembargo, Ebecilio ta deseá na informá prensa ku durante su entrevista tokante narsismo, e no a pone niun konekshon ku Minister Silvania. I ku e akusashonnan dje Minister, kaminda e ta relashoná Ebecilio na algun manera ku un artíkulo di korant di dia 3 di ougùstùs 2022 tokante un sikólogo ku durante dekadanan supuestamente a kometé aktonan seksual ku pashèntnan (menor di edat), no tin base, no ta korekto i definitivamente no ta tokante Ebecilio.”

Manera e abogado ta bisa, Silvania no a konfirmá di a risibí e karta fechá 15 di sèptèmber último. Echo ta ku a pidié rektifiká promé ku dia 16 di sèptèmber, i e no a ni reakshoná te pa rektifiká. Den e karta ku e eksigensia di rektifikashon, e ofisina di abogado a kompilá tur e postnan di Silvania riba su página sosial. Ta trata di mensahenan propio, pero tambe di otronan ku el a kompartí riba su página di entre otro individuonan ku ta pretendé di ta miembro di prensa. Silvania a kompartí dia 8 di sèptèmber un post di un hende ku ta papia di ‘karaktermoord’ den sikologia, ilustrando un foto di tantu e komo Ebicilio. E siguiente dia el a post sigur 4 biaha.

E Minister a kuminsá ku un artíkulo bieu di korant ku ta papia di un sikólogo abusador seksual ku e splikashon ‘Memoria ta kòrtiku. Bosnan ta kòrda ta kua sikólogo a abusá di klientenan pa algun dekada?? Rara ken por refreská memoria di MinFin. E mundu akí ta hopi chikí.’ Segun e karta di abogado, den e komentarionan ta relashoná e artíkulo ku Ebecilio. Despues el a post ‘Dikon un sikólogo ta bai TV Direct yama MinFin un narsista? Splikami e koi’. Segun e karta di abogado, el a kita e post bèk. Pero algun ratu despues a post algu atrobe: ‘Un kansion pa tur mi HATERS ku tantu ta stimami. Bo KARAKTERMOORD no por mata ami. Atami riba pia BON BON’, kompañá pa e tambú di grupo Zoyoyo titulá ‘Bon Bon’. Despues e ta post un foto dje trahadó di e kanal di televishon ku a entrevistá Ebecilio, riba kua su foto mes tambe ta paresé, kombiná ku e teksto di korant tokante e sikólogo abusador seksual. I riba e mesun dia e ta kompartí algu ku un hende a publiká tokante ‘kadaver den kashi dje sikólogo Embicil’.

E siguiente dia Minister Silvania a bolbe publiká e artíkulo dje korant i un biaha mas personanan den komentario a relashoná e notisia negativo ei ku Ebecilio. E karta dje abogado ta yama Silvania un instigadó pa loke el a hasi dia 10 di sèptèmber akí. I djaluna dia 11 di sèptèmber, Silvania a kompartí loke un otro a publiká atrobe, tokante un kaso ku Ebecilio a entamá kontra Ontvanger i e banko di seguro sosial SVB, usando 6 foto dje sentensia. Segun e persona esei tabata e motibu pa kua Ebecilio lo a yama Silvania narsista. Djis un ratu despues el a publiká e sentensia di hof ku e sikólogo debe 700 mil florin na impuesto. E ta post 2 kos mas tokante esaki. I riba e último dia, 12 di sèptèmber, el a kompartí mensahe di ruman hòmber di Minister Sithree van Heydoorn tokante sikólogo ku no tin su propio bida na òrdu.

E abogado a duna diferente teksto di rektifikashon, pero Silvania no a ni reakshoná. I awó Ebecilio a disidí di no gasta tempu ni plaka mas.