WILLEMSTAD – Inspekshon di Salubridat, ku inspektor Sirving Keli na kabes a bolbe imponé un instrukshon (aanwijzing) mas riba Curaçao Medical Center (CMC). E hòspital ta obligá pa raportá tur siman tokante e situashon pa ku retironan anunsiá delantá di spesialistanan médiko for di CMC. Ademas CMC mester entregá un Plan di Enfoke konkreto dia 7 di yüli, relashoná ku e strategia pa garantisá kontinuashon di kuido responsabel pa pashèntnan, tumando den konsiderashon e posibilidatnan di retiro (previsto) di spesialistanan médiko.

E “aanwijzing” ta keda na vigor te ora e situashon relashoná ku e lei “Landsverordening Normering Topinkomens (LNT)” bira normal i ta na satiffakshon di Inspekshon di Salubridat. Keli a manda un kopia di e instrukshon duná ayera na CMC pa tantu e Ministerio di Salubridat, Medio Ambiente i Naturalesa (GMN) Javier Silvania, komo pa e tòp di Banko di Seguro Sosial, SVB. A publiká e LNT na final di desèmber i esaki a drenta na vigor dia 1 di yanüari último. E lei ta konta tambe pa CMC, inkluyendo e spesialistanan médiko den servisio di CMC i ku ta kai bou di e reglanan di LNT.

“Durante e siguiente lunanan a sigui desaroyonan ku a kondusí na un huisio sumario di “Raad van Bestuur” (RvB), huntu ku e gerensia di de Vereniging van Medische Professionals in Dienstverband (VMPiL), kontra pais Kòrsou. Komo konsekuensia di e sentensia di 14 di yüni 2023 di Korte, a mantené e aplikashon di e LNT riba CMC, inkluyendo funshonarionan altu di CMC, manera e spesialistanan médiko den servisio. Pa motibu di esei diferente spesialista médiko a bisa ku nan no ta keda mas den servisio di CMC. Segun loke RvB a menshoná, tin diferente kandidato tambe ku a renunsiá empleo komo spesialista médiko na CMC debí na e LNT. Segun boso indikashon, vários kandidato tambe a ninga un trabou komo spesialista médiko di CMC, debí na e LNT.”

Keli a enfatisá den su karta di ayera ku si e retiro ku spesialistanan médiko di CMC a anunsiá delantá a kombertí den realidat, esaki lo pone hopi preshon riba kontinuashon di kuido spesialisá di pashènt na CMC. Keli: “Ta nesesario pa boso komo RvB atendé e situashon ku a surgi akí ku rapides, preokupashon i akshon na tempu pa minimalisá e efektonan di e skarsedat ku por surgi òf e konsekuensianan ku por resultá di esaki mas mihó posibel. E situashon a kambia fundamentalmente pa boso komo RvB. Finalmente komo institushon boso tabatin libertat kompleto pa prosedé kontra e LNT, huntu ku boso empleadonan, pero awó boso ta den un posishon kaminda, segun artíkulo 10 di e asina yamá “Landsverordening Zorginstellingen”, boso ta obligá pa hasi tur loke ta posibel den boso poder, inkluyendo reklutashon i organisashon di personal, inkluyendo dje spesialistanan médiko, pa sigurá kuido di salú responsabel konforme artíkulonan 8 i 9 di ei ordenansa.”

Segun Keli, ta aki ta kaminda ku RvB su obligashonnan i responsabilidat, manera ta stipulá den artíkulonan 8 te 10 di LvO Zorginstellingen i e posishon di e spesialistanan pa motibu di LNT, den algun kaso ta para ariba aktivamente pa ‘laga gobièrnu chupa e preimu awó. Pero den realidat, artíkulo 10 dje LvO Zorginstellingen ta obligá e RvB pa mitigá e konsekuensianan di retiro i pa antisipá i kuminsá hasi tur esfuerso máksimo pa yena e vakaturanan ku a habri na tempu. P’esei Inspekshon ta yega na e siguiente konklushonnan. Si e retiro masal òf gradual anunsiá di spesialistanan, resultá den un skarsedat grandi, ta nesesario tuma akshon kontinuo i na tempu pa sigui garantisá e kuido di pashèntnan. Tambe ta nesesario un esfuerso sumamente presis i máksimo pa kumpli ku artíkulonan 8 te ku 10 dje LvO Zorginstellingen. Relashoná ku esaki, ta nesesario pa hasi un supervishon intensivo pa loke ta trata e posibilidat di retiro di spesialistanan médiko, spesialistanan ku a anunsiá nan retiro i spesialistanan médiko ku a entregá nan retiro di bèrdat. “Mester desaroyá un Plan di Akshon mas lihé posibel pa konfrontá e situashon akí di manera optimal.”

Basá riba esaki, Inspekshon a imponé e siguiente “aanwijzing” na CMC. Ounke no tin indikashon di un violashon di parti RvB relashoná ku e situashon di LNT, esaki no ta kita e poder di Inspekshon di Salubridat pa duna un ‘aanwijzing” promé, relashoná ku e skarsedat na spesialistanan médiko i e konsekuensianan serio di esaki. “For di djárason 29 di yüni 2023, CMC mester raportá na Inspekshon semanalmente tokante e státus di retiro anunsiá di spesialistanan for di CMC. Den e rapòrt, mester spesifiká semper e státus dje kantidat di retiro anunsiá (oralmente), retironan entregá i dje spesialistanan médiko ku a bai, konforme kada un su disiplina,

Ademas CMC mester presentá un plan di akshon konkreto di CMC dia 7 di yüli próksimo, tokante e maneho pa garantisá kontinuishon (den futuro) di kuido responsabel di pashèntnan, teniendo kuenta ku retiro (antisipá) di spesialistanan. Keli: “E “aanwijzing” aki ta keda vigente te ora ku e situashon di LNT normalisá i trankilidat bolbe, ku satisfakshon di Inspekshon.”