Efektonan okashoná pa Covid i desishon pa un “lockdown” marginá, lo haña efekto riba merkado di konsumo durante segundo mitar di 2021.

Punda— Efektonan ekonómiko okashoná pa Covid i desishon pa un “lockdown” marginá, lo haña efekto riba merkado di konsumo durante segundo mitar di 2021. Kòrsou lo no ta nada diferente ku demas partinan di mundu unda un di dos lockdown lo tin efektonan mas severo.

E paro di ekonomia, okashoná pa e “lockdown” lo sigui duna efektonan negativo riba kresementu ekonómiko durante promé kuartal di 2021 i oumentá durante segundo mitar.  Medidanan di Toke de Keda introdusí  na inisio di 2021, ta perkurá pa manda desaroyo negativo te sigui na finalnan di segundo mitar di 2021. E efektonan preliminar ta indiká ku durante 2020, for di aprel negoshinan di Kòrsou a bende kasi 1.8 mil mion florin ménos. E bahada den benta a okashoná un desempleo di entre 6 pa 8 mil persona. 2021, lo no tin un diferensha si Covid sigui mantené su presensha kombiná ku eskalashon di medidanan pa restringí agrupashon sosial.

E desaroyonan ekonómiko  lo dependé naturalmente atrobe kuantu finansiamentu polítika na Den Haag disidí nan tei duna. Hulanda su sosten finansiero pa 2020 ta planeá  pa yega un 24 mion mensual durante 2021. Pero te ainda gobièrnu di Hulanda ta papiando riba sosten te despues di yüni 2021. Na 2020, manera menshoná e sosten a yega 670 mion, pero tin indikashon pa 2021 e suma lo ta hopi mas abou.

Na aprel 2020 Kòrsou a risibi 114 mion florin pa sosten presupuestario mas 63 mion florin na pakete di sosten. Durante mei, Hulanda a depositá 141 mion florin pa sosten di likides riba presupuesto. I na mei a bolbe risibi 63 mion florin na pakete di sosten. Pa novèmber Hulanda a depositá 286 mion florin mas. E suma di sosten te ku mei 2020 a yega 381 mion florin en total. Pero pa sera último kuartal di 2020, Kòrsou a risibi 286 mion. Di e sumanan aki, solamente 107 mion florin a bai na sosten di komersio. Demas, gobiernu a guli.

E nesesidat finansiero pa gobièrnu di Kòrsou, lo no ta muchu diferente durante promé kuartal di 2021. Bahada den pagonan di impuesto den tur kategoria lo okashoná un défisit serio fo’i inisio di 2021. Hulanda lo sigui  uza COHO komo èrmènt pa yuda, lokual ta un situashon tenso pa desaroyonan polítiko di Kòrsou. E akuerdo polítiko ku Rhuggenaath i Martina a firma,  ta un fase preliminar pa kuminsá enkaminá e formashon di e Leinan di COHO i akuerdonan bilateral na nivel di pais, e asina yamá Pakete di Pais. Hulanda tin mira a largo plaso pa ehekushon di e lei nobo. E Lei di Konsenso nobo a trese kambio den e lei di Konsenso pa Supervishon Finansiero spesífikamente pa por drenta mas profundo den kòntròl riba gastunan di e servisionan di gobièrnu. E Lei di Konsenso kombiná ku e Pakete di Pais, ta eliminá tur outoridat for di ministernan den gobièrnu di Kòrsou. Ku e lei nobo, Hulanda por uza instrumentonan pa influensha maneho den tur servisio di gobièrnu, inkluso por ehèmpel pone hefe di departamento nobo. E dilema aki ta unu ku e siguiente kabinèt mester atendé.