SOAB yudando Ontvanger pa atministrá prosesonan bankario mas lihé.

Schottegatweg—E ofisina estatal di kompatibilidat, SOAB, ta hasiendo un bon trabou pa duna asistensha na Kaha di Gobièrnu, Ontvanger. E asistensha ta enserá pa prosesá i atministrá transakshonnan bankario mas lihé i efisiente. Esaki ta lokual nan boletin di kuartal 2 2023, ta indiká.

SOAB ta tratando pa Ontvanger kuminsá obligá bankonan lokal di prosesá nan rekuento (afschrift) outomátiko en bes di manual. Ku eksepshon di MCB, demas bankonan ta prosesando nan rekuentonan ainda manual.  Algun banko a risibi un karta di Ontvanger ku nan deseo pa prosesá e rekuentonan bankarionan outomátikamente.  Den e karta alabes Ontvanger a stipulá e kondishonnan bou di kua e archivonan i data mester kumpli.

Te ainda segun SOAB, no ta tur banko a reakshoná riba petishon di Ontvanger. Orco Bank, FCIB i Vidanova a konfirmá di lo adaptá nan sistema di manual pa outomátiko, miéntras RBC a informá ontvanger ku n’e momentonan aki nan tin otro prioridat. Pa por logra outomatisá, mester bini un FTP Server nobo i mas grandi, segun SOAB. Ta spera e FTP Server nobo yega na finalnan di Yüli próksimo. Esaki lo ta un adelanto grandi pa Ontvanger i nan klientenan.

Un otro problema ku SOAB a konstatá ta demasiado kuenta intermediario na Ontvanger. E kousa ta debí na demasiado kliente pagadó na Ontvanger no ta duna bon deskripshon di nan pago. Konsekuentemente, no por determiná por ehèmpel kua impuesto e kliente a paga i den kua periodo.