WILLEMSTAD – Stichting Exploitatie Wilhelmina Tehuis a gana un kaso kontra un mal pagadó di hür di un apartamento. E fundashon a bai Korte pa eksigí saka e dama akí for di e apartamento i Korte a bai di akuerdo, dunand’ e te ku 1 di aprel akí p’e sali.

E kontrakt di hür entre e partidonan ta data for di 2004. E kasá dje dama ta esun ku a hür e apartamento inisialmente. Despues di e fayesementu di su kasá na ougùstùs aña pasá, e dama a kontinuá ku e kontrakt di hür. Sinembargo, for di e luna ei mes e no a paga niun hür mas, loke a kousa un debe grandi den hür. E fundashon a deskubrí un atraso den hür te ku desèmber 2023 di 6.650,50 florin. E dama no ta refutá e suma akí. Pero el a pidi pa suspendé e pago debí na defektonan na e propiedat, manera un baki di laba tayó den kushina di kua e awa no ta bai pasó esaki ta “verstopt” i tambe tin awa den e pòrch. Sinembargo, Korte ta husga ku e defektonan akí no tabata sufisiente pa suspendé e hür, pasó mantené e parti paden dje propiedat, ta responsabilidat di e hürdó, manera stipulá den kontrakt di hür. Ademas e defektonan na e pòrch no tabata hustifiká pa suspendé e hür.

Korte a yega na e konklushon ademas ku e retraso di pago di hür ta asina grandi i tabata sufisiente pa konkluí ku un otro hues den un prosedura den fondo (“bodemprocedure”) lo konfirmá e desolushon dje kontrakt di hür tòg. Pa e motibu akí Korte a kondená e hürdó pa bandoná e propiedat i paga e atraso den hür, oumentá ku interesnan legal. E eksigensia dje dama pa drecha e defektonan i pa redusí e preis di hür tambe Korte a rechasá. A laga e dama hasi e prosedura sivil akí grátis, pero a konden’é sí den pago dje proseduranan dje fundashon, kalkulá na 2.304,73 florin. Lo kobra esaki solamente si un di nan bai den apelashon kontra e sentensia.

Di tur manera e hürdó a haña te ku 1 di aprel mas tardá pa tantu e komo tur hende ku tabata biba den e apartamento, bandoná e apartamento akí huntu ku tur nan propiedatnan, i pa duna e fundashon e yabinan di kas bèk. Sí no duna oido na e sentensia akí, un dùrwarder tin outoridat pa laga saka tur hende i kos ku yudansa di polis. E dama mester paga e debe di hür atrasá tambe di 6.650,50 florin, plùs 1.360 florin pa luna kontando for di 31 di desèmber 2023 te ku e dia ku e bandoná e apartamento, plùs interes for di 19 di yanüari 2023 (ku ta e fecha ku e fundashon a entamá e kaso), te na dia ku e hasi tur pago kompleto.

Pero e fundashon mes tambe tin ku paga e dama 826,64 florin, mas interes legal for di 15 di desèmber 2022 te ku dia ku e pago ta hasí kompleto. Ta trata akí di gastunan ku e mester a paga e fundashon pa notifik’é di un sentensia anterior di desèmber 2022, ku ta un sentensia preliminar den un huisio sumario, den kua Korte a dikta ku e dama mester bandoná e propiedat di forma kondishonal. Awó e desishon akí no ta kondishonal mas, pero a bira un echo ku e tin te ku 1 di aprel pa sali.