Willemstad – Pa redusí e listanan di warda (wachtlijsten) pa kuido na kas, Stichting Thuiszorg Banda’Bou ta amplia su área di kuido. Ta amplia e servisionan pa e áreanan St. Michiel, Groot Piscadera, Paradijs, Piscadera Baai, Mundo Nobo i Otrobanda.

Stichting Thuiszorg Banda’Bou (TZBB) ta un organisashon ku tin e sertifikado di ISO ku for di ántes ta ofresé kuido na kas i servisio di transpòrt na habitantenan di e barionan for di Souax te ku Westpunt. E fundashon ta risibí regularmente keho di hende ku no ta kontentu ku e kuido ku nan ta risibí òf nan mester warda largu pa haña bon kuido. TZBB ta miembro di Stichting Federatie Zorginstellingen i ke traha riba kuido na kas di kalidat no solamente pa Bándabou, pero pa henter Kòrsou. Pa e motibunan akí TZBB a disidí di amplia su área di kuido ya mas hende por haña kuido di kalidat.

Pa ofresé kuido na kas riba un nivel haltu, TZBB ta mantené su mes na e prinsipionan di ISO ku ta konsistí di proseduranan i normanan pa kuido na kas. Un di e normanan ta ku e kliente ta sentral i a base di su nesesidat ta determiná kiko e persona mester. Tambe ta tene kuenta ku e bisendario rònt di e kliente. Huntu ku e kliente ta krea un plan di kuido.