Sherwin Elvilia di STS na man robes sintá na mesa ku Elgin Felipa di ASPEN.

Veeris—Lider di Sindikato STS, kende ta representá empleadonan den seguro (Ennia), ayera a ekspresá su prekupashon riba e situashon na Ennia. Ta trata di sr. Sherwin Elvilia, kende tabata na un rueda di prensa ku e sentralnan sindikal, CGTC i SSK a organisá riba Ennia.

Tabata un rueda di prensa unda a anunsiá un aliansa entre algun organisashon pa defendé interes di penshonanan Ennia i empleadonan. Na e rueda di prensa tabata presente representantenan di CGTC, George Hernandez, SSK Wendell Meulen, ASPEN Elgin Felipa, STS Sherwin Elvilia, CBV Analiza Mathilda i pa  Boneiru Usibo Angelo Vrolijk.

Elvilia a konfirmá ayera ku nan sindikato STS ta representá empleadonan ku ta traha den sektor di seguro i den e kaso aki tambe empleadonan na Ennia. Nan a bini ayera komo miembro di CGTC i uni forsa pa forma un moketa pa salbaguardiá Ennia. Elvilia ayera a trese dilanti ku tin un insertidumbre bou di empleadonan na Ennia. Nan ta den e boto na Ennia komo trahadó i bo ta sinti e prekupashonnan pasobra bo no sa ta kiko ta bai pasa komo empleado na Ennia ni tampoko kiko ta bai pasa ku bo penshun, e la bisa ayera.