WILLEMSTAD – Projectteam Toezicht en Handhaving (PTH) di Ministerio di Tráfiko, Transporte i Planifikashon Urbano (VVRP) ta duna un resumen di diferente trabou ehekutá resientemente. Esaki ku e meta pa konsientisá nos komunidat pa loke ta konstrukshon na un manera seif, i uso adekuá di tereno di gobièrnu.  

Rooi Santu

PTH a hasi inspekshon di un tereno na Rooi Santu, despues di a risibí keho ku doño di un kas riba tereno di gobièrnu, ta resistí pa Aqualectra por hasi trabounan di mantenshon i pasa un kabel den tera pa por bai na e bibiendanan mas patras. Na e sitio, PTH a bin topa ku doño di e kas i a yega na un solushon pa asina Aqualectra por hasi e trabounan di mantenshon. 

Den e mesun área aki, PTH a hasi inspekshon di un otro tereno despues di a risibi keho di bisiñanan ku aparentemente ta yena un tereno ku tera pa tapa algun shushi ku nan mes a pone riba e tereno enkuestion. Na a sitio PTH a bin topa un seru di tera tapando un gran kantidat di shushi ku tabata tin riba e tereno. A konstatá kua bisiña ta hasiendo su mes kulpabel di dùmpmentu di sushi i dèmpelmentu di tereno ku tera. PTH a saka potrèt di e situashon aktual i ta sigui ku mas investigashon.

Weto

PTH a hasi inspekshon di un tereno den área di Weto despues di a risibí keho ku deskonosínan ta trahando un muraya di kas. Na e sitio, PTH a bin komuniká ku un persona presente kual a indika ku ta su yu ta serando un kura, pa asina evitá ku kachonan ta sali i morde bestianan di krio di bisiña. E persona a indiká di tin e dokumentonan di tereno nesesario, pues e investigashon lo kontinuá. 

Montague 

Bisiñanan a entrega un keho den kual ta indiká ku un bisiña a kue nan tereno pa traha kura di kabritu. Esaki ta den e área patras di ántes Bakerij de Zon. PTH a bai na e sitio i no tabata tin niun hende presente. Lo investigá e kaso aki mas aleu. 

Sta Rosaweg

PTH a tuma nota di un konteiner poné ilegalmente riba tereno di gobièrnu sin pèrmit pa uso di e tereno. A yama  esun responsabel pa kita e konteiner aki mesora, i si esaki no sosodé, PTH ta laga kit’é riba kosto di esun ku a poné. 

Fortuna ariba

PTH a risibí un notifikashon ku un dòmtrùk ta bashando sushi riba tereno di gòbiernu. Na yegada na e sitio, no a mira e dòmtrùk. PTH ta atvertí tur ku ta basha sushi ilegal, ku awor ta aktuando severamente kontra di esaki huntu ku Polis. 

Caracasbaai

PTH a risibi un keho ku riba Caracabaaiweg lo ta trahando un kas sin pèrmit di konstrukshon. Na yegada, PTH a konstatá ku tin un pèrmit pa konstrui. PTH ta aploudí tur suidadano ku ta hasi trabou di konstrukshon ku nan pèrmitnan nesesario. 

Den e mesun área di Caracasbaai, PTH a hasi inspekshon di un tereno enfrente di un restorant. Esaki despues di a risibí keho ku e propietario di e restorant aki a laga limpia un tereno enfrente di e restorant, i ta laga su klientenan stashoná outo. Na e sitio, PTH a komuniká ku e propietario kual a indiká ku bèrdat el a laga limpia e tereno enkuestion pa su klientenan por stashoná outo. E propietario a indiká ku e tin un petishon na Domeinbeheer pa risibí e tereno enkuestion. PTH a indiká na e propietario ku miéntras ku e no tin e título di e tereno, e no mág usa esaki den ningun forma, i ku e mester lag’é keda den su estado original. E mester hasi uzo di e lugá di stashoná ku el a entregá huntu ku su pèrmit di konstrukshon.

Sun Valley

Despues di a risibí notifikashon, PTH a konstatá ku tin konstrukshon ilegal tumando lugá na un adrès konserní. A bin konstatá ku no ta tin un pèrmit pa konstruí. A para e trabounan i a manda e doño bai regla su pèrmit di konstrukshon na ROP, i indiká na dje ku e no por sigui ku konstrukshon miéntras e no tin su pèrmit.

Punda/Pietermaai 

PTH a konstatá ku tabata konsturiendo un bòrchi pa parkeo. Na momentu ku PTH a bai chèk si esaki tin e pèrmit nesesario, a konstatá ku esaki no tin pèrmit. A para e trabou i a manda e persona enkuestion bai ROP pa regla su pèrmit promé ku sigui. 

Rondeklip

Akinan a konstatá un disputa entre dos famia ku a kumpra e mes un tereno ‘huurgrond’ serka un tersera. Ámbos ta indiká ku ta nan ta doño. E investigashon ta sigui i lo manda ambos partido pa Domeinbeheer. PTH ta hasi un apelashon serio na tur suidadano pa paga tinu ora ta kumpra propiedat! Por chèk status di e tereno semper na Kadaster promé ku kumpra.

Den e mesun área aki, a hasi diferente kòntròl kaminda PTH a para diferente trabounan di konstrukshon ilegal riba terenonan di gobièrnu. 

PTH tin komo tarea pa inspekshoná i kontrolá trabounan di konstrukshon i okupashon di terenonan di gobièrnu, tiramentu di sushi ilegal riba tereno di gobièrnu, i kobamentu ilegal pa gana diabas. E tim ta konsistí di inspektornan ku ta ehersé e trabounan menshoná. PTH lo kuminsá suministrá informashon di trabounan ehersé riba un base regular semanal ku e meta pa konsientisá komunidat. 

Pa por tuma kontakto ku PTH i/òf raportá un posibel kaso di konstrukshon ilegal òf okupashon ilegal di tereno, por yama na 465-1477.