Willemstad- Den un grabashon live riba e plataforma di Fcaebook Minister di Tráfiko, Transporte i Planifikashon Urbano, Charles Cooper ta splika ku a saka e kòmpiuter di e lusnan na Pòst 5 pa asina usa esakinan riba e lusnan na e Sede di PAR. Pues e lusnan na Pòst 5 ta for di servisio ya esnan na monumento di Saliña por ta den funshon.

Pa ta mas spesífiko ta trata di e lusnan di tráfiko na e monumento na Saliña dilanti di sede di partido PAR òf Schottegatweg Zuid ora ku bo ta bini di Nieuwe Haven. Minister Cooper ta splika ku mas o ménos dos siman pasá a surgi un problema ku e sistema di chep di e lusnan, kual ta e kos mas prinsipal di e kòmpiuter di e lusnan di trafiko. Esaki a pone ku e lusnan tabata kompletamente for di funshon. Na e momentu ei a tuma kontakto ku e fabrikante via di e kontratista ku ta drecha lusnan di tráfiko na Kòrsou. E fabrikante a splika ku e tin e kòmpiuter aki sinembargo dor di Covid lo no por entrega esaki na Kòrsou.

Minister Cooper ta sigui splika ku el a tuma e desishon pa pasa pa un plan B. E plan B aki ta enserá e sakrifisio di otro lusnan ku ta ménos peligroso. Pues a saka e kòmpiuter di e lusnan di tráfiko na Pòst 5 pa asina remplasá esnan na Schottegatweg Zuid. Segun Minister Cooper, e motibu ku a skohe Pòst 5 ta pasobra esaki básikamente a bira un T-kruising i no ta asina peligroso.