WILLEMSTAD,– Un hòmber di 30 aña a bai Korte na Utrecht ku un petishon pa ninga paternidat di esun ku hurídikamente ta su tata. E kaso ta drai rondó dje pregunta si por mir’é ainda komo tata dje hòmber akí. Ounke e tata hurídiko i e mama ta partidonan ku interes den e kaso, nan no a presentá na tratamentu di e kaso, ni a entregá niun defensa kontra e petishon.

E hòmber akí a nase na 1992 i su tata legal a rekonosé komo yu despues di a kasa ku su mama na 1994. Tantu e mama komo su kasá tabatin nashonalidat hulandes na e momentu ei. Sinembargo despues dje separashon di e mayornan na 2003, e hòmber no a mira su tata legal mas. Ta aña pasá numa ku ta e mesun aña ku su mama a muda pa Hulanda i despues ku e mes a muda pa Hulanda for di 2013, el a hañ’é konfrontá ku e echo ku e hòmber probablemente no ta su tata biológiko. Tin papiá ku ta un otro hòmber ta su tata biológiko. Ademas resultado di un investigashon di DNA imbálido, a mustra ku e tata hurídiko pa mas ku 99,999999% siguransa no ta su tata biológiko.

Korte di Utrecht a evaluá e petishon dje yu akí kuidadosamente pa ninga e paternidat di su tata hurídiko. Tabata na Korte pues pa determiná sí e ta atmisibel den su petishon i si el a entregá sufisiente prueba pa demostrá e ousensia di paternidat biológiko di su tata hurídiko. Apesar ku e no a presentá un defensa, Korte a investigá e kaso te den fondo tòg i a konstatá na promé lugá ku un hues hulandes ta outorisá pa trata e petishon, pasó e yu ta biba na Hulanda. Ademas a apliká e lei di Kòrsou, pasó na momentu di su nasementu e hòmber tabata biba na Kòrsou. For di e informashon ku Korte a risibí i deklarashonnan dje yu, ta resultá ku ta te aña pasá numa a inform’é dje sospecho ku su tata legal no ta su tata biológiko.

Apesar di no a entregá un defensa, Korte a husga ku el a entregá sufisiente prueba pa demostrá ku su tata hurídiko no por tabata su tata biológiko. Porlotantu Korte a deklará su rechaso di paternidat dje hòmber ku tabata su tata legal bon fundamentá. Sinembargo, Korte a rechasá su petishon pa deklará ku mester ehekutá e sentensia akí dirèkt, pasó ahustá su akta di nasementu lo no ta posibel te despues ku e desishon di Korte ta definitivo. I tur e partidonan embolbí pa lei tin 3 luna di tempu pa apelá e desishon akí serka Korte di Arnhem-Leeuwaarden. Te despues ku e periodo akí pasa i niun hende a apelá, por ehekutá e sentensia, esta kambia su akta di nasementu ningando paternidat di su tata hurídiko.