WILLEMSTAD – Minister di Finansa Javier Silvania a manda un karta ayera pa e kolegio di supervishon finansiero Cft, pa medio di Presidente Lidewijde Ongering, ku un petishon delantá relashoná ku e ‘ontwerpbegroting 2024’ (OB 2024), esta e konsepto dje Presupuesto di Pais pa aña 2024.

Den su petishon Silvania ta pidi Cft pa tene kuenta ku e asuntu di solushon pa e problema finansiero di Ennia, e fiansanan di likides na balor di 910 mion florin i tambe resolushon di Curaçao Medical Center (CMC).

Cft lo mester duna konseho konforme artíkulo 11 dje lei di Reino di supervishon finansiero, ‘Rijkswet financieel toezicht Curaçao en Sint Maarten’ (Rft). For di e karta por dedusí ku Silvania ya a papia ku Ongering dia 17 di ougùstùs último, tokante e negosiashonnan importante ku ta tuma lugá relashoná ku e resolushon di Ennia i e refinansiamentu dje fiansanan di likides. “Pa laga e negosiashonnan por tin e mihó efekto posibel, a pidi na CBCS (Banko Sentral di Kòrsou i St. Maarten) pa kalkulá un variedat di senario i pa duna un bista di esaki den tantu e presupuesto komo e perspektivanan ekonómiko di Pais. Debí na e papel di Cft pa ku e supervishon den kuadro dje Rft, spesialmente relashoná ku e kapasidat finansiero di Pais den komparashon ku e kondishonnan di fiansa ku lo keda akordá i e perspektivanan fiskal pa Pais den añanan benidero, nos lo pidi un konseho di Cft tambe basá riba artíkulo 16 di Rft.”

Segun e Minister, basá riba e kalkulashonnan di CBCS i e konseho di Cft, gobièrnu lo diskutí e kondishonan di fiansa ku Hulanda, inkluyendo e konsekuensianan pa e presupuesto. Te despues ku determiná e kondishonnan di fiansa definitivamente, gobièrnu por tuma un desishon final relashoná ku e resolushon di Ennia i e posibel konsekuensianan di esaki, pa por inkorporá esakinan den e OB 2024. Esaki ta konta tambe p’e inkorporashon dje kondishonnan di fiansa, pa loke ta trata e fiansanan di likides. Silvania na Ongering: “Mirando e importansia di e dos fiansanan menshoná riba e presupuesto di pais, no ta irasonabel pa entregá un nota di kambio dje OB 2024 despues ku e kondishonnan di fiansa di ámbos fiansa a bira konosí. Naturalmente lo presentá e nota di kambio dje OB 2024 (sí tin un kambio supstansial den e OB 2024) pa konseho na Raad van Advies i Cft (naturalmente tumando e normanan di Rft den konsiderashon).”

Silvania a papia ku Ongering riba 17 di ougùstùs último tambe tokante e status dje resolushon di CMC, kaminda a indiká ku un instituto hulandes lo duna un konseho (na kuminsamentu di e di kuater trimèster di 2023) relashoná ku e struktura di finansiamentu planiá pa CMC. “E eventual impakto di esaki riba e presupuesto di pais lo ta inkorporá den e nota di kambio dje OB 2024. Por fabor, mi petishon ta pa un konseho relashoná ku OB 2024, konforme artíkulo 11 di Rft, kaminda mester tene kuenta ku e asuntunan anteriormente menshoná relashoná ku e resolushon di Ennia, e fiansanan di likides i e resolushon di CMC.” Asina e Minister di Finansa a skirbi p’e Presidente di Cft. E karta a bai ayera pa Ongering.