Na inisio di Òktober Avior Airlines a kuminsá ku nan ruta Venezuela Kòrsou di nobo, kual por sierto lo tin efekto positivo pa turismo for di e pais.

Willemstad,– For di datos disponibel por nota ku turismo for di Venezuela ta lantando kabes, pero ainda e pais aki no ta generá un entrada supstansial pa Kòrsou.

Pa luna di sèptèmber 2023, por nota ku 953 persona a bin Kòrsou for di Venezuela. Komparando e kantidat di bishitá ku sèptèmber 2022, e suma aki tabata solamente na 96 turista. Mas aleu, por nota ku sptèmber 2015 e kantidat di turista ku tabata bishitá Kòrsou for di Venezuela tabata alrededor di 9800 turista.

Di e 953 turistanan ku a bin Kòrsou for di Venezuela, por nota ku e turistanan aki konhuntamente a pasa 6703 anochi kumulativo. Esaki ta nifiká ku aktualmente un turista for di Venezuela ta kedando ku un promedio di 7 dia riba nos isla karibense.

Komparando e sifranan aki ku sifranan for di 2015 por nota ku ainda Kòrsou tin basta trabou pa hasi pa asina konsiderá Venezuela komo un pais realísitiko pa generá entrada ekonómiko. Ta asina ku for di kalkulashon nan di 2015, turismo for di Venezuela a generá alrededor di 68 mion dòler. E kalkulashon ta pasá riba e echo ku na 2015 Kòrsou a risibí 94.726 turista ku konhuntamente a pasa 581 mil anochi na Kòrsou. Basá riba e echo ku un turista Venezolano tabata invertí 118 dòler pa dia den ekonomia di Kòrsou. Por kalkulá ku Venezuela tabata generá 68 mion dòler.

Apesar ku frontera a habri ku Venezuela i Kòrsou por nota ku ainda Kòrsou no por risibí turistanan for di Venezuela ku man nan habrí. Debí ku Hulanda ta disidí riba tur asuntu di relashon nan den eksterior pa paisnan den reino, por nota ku Kòrsou no por djis fasilitá e proseso pa risibí personanan ku nashonalidat Venezolano.

Den pasado Hulanda a imponé ku reino Hulandes por honra solamente 200 visa, pero basá riba datos publiká dor di CTB por nota ku e regla aki ta aliviando.